بركیاروق —
ملكشاه سلچوقینك اوغلیدر و مخلصی ركن الدوله+در. پدری (١٠٩٢ م و ٤٨٥ ه) تاریخنده وفات ایلدكده دیكر اوغلی صبی (ناصرالدین) تخته چیقارلدیسه ده اصفهانده بولنان امرا اشبو (بركیاروق)ه بیعت ایتدكلرندن امرا و اهالی بیننه تفرقه دوشدی و بر آره+لق ناصرك والده+سنك تأثیر نفوذیله بركیاروق خلع و حبس اولندیسه ده مؤخراً ینه اجلاس اولندی و بو تفرقه و اختلال تمام بر سنه+دن زیاده سوردی. متوفی ملكشاه وفاتندن بر هفته اول بغداد خلیفه+سی (مقتدی بالله)ه بغداددن چكلسون كتسون آرتق كلوب بن اوتورە+جغم دیو خبر كوندرمش و بیچاره مقتدی ذاتاً دخی بر نفوذی اولمدیغندن تختنی تركه موافقت ایدوب بر هفته مساعده المش و حاضرلنمقده بولنمش ایدی خلیفۀ مشار+الیهك بغداددن چیقه+جغنه بر كون قله ملكشاهك وفاتی خبری كلدیكی كبی ینه تختنه مالك اولدی و هركس بو تصادفی مفتدینك كرامتنه ویردی. بركیاروق زمان سلطنتنده ماوراءالنهرده ظهورایدن ظالم مشهور آرغونی اخذ و قتل ایدوب عباداللهی شرندن خلاص ایلدی و اردوسنده و ممالك محروسه+سنده اولان باطنیلرك كافه+سنی قلیجدن كچوردی و عاقبت (١١٠٤ م و ٤٩٨ ه) تاریخنده مسلولا وفات ایدوب باطنده سلطنت ظاهریه+نك ده حكمی اولمدیغنی اكلادی