)برسبای —
ملوك چراکسۀ مصریه طرفندن یمن سرداری بولنان ذاتك اسمدر (١٥١٧ م و ٩٢٣ ه) تاریخنده مصر سلطان سلیم خان اول حضرتلری طرفندن ضبط اولندقده سردار مومی+الیه درحال پادشاه مشار+الیهه عرض انقیاد و اطاعت ایتدیكنه بناء وفاتنه قدر مأموریتنده ابقا ایدلمش و وفاتی عقیبنده طرف دولت علیه+دن ایلك مأمور اولمق اوزره یمن والیلكنه (المحضرم) دیو تلقیب اولنان (امیر اسكندر) كوندریلوب نام نامیء سلیم خانی خطبه+ده قرائت ایتدیرلمش ایدی.