) پرتو پاشا — (١٥٧١ م و ٩٧٩ ه) تاریخنده وزیر ثانی ایكن سلطان سلیم خان ثانی حضرتلری طرفندن دوننمای همایونه سردار و مؤذن زاده دیمكله معروف علی پاشا دخی مذكور دوننمایه قپودان نصب و تعیین
اولندی و مشهور اولوج علی پاشاده كندی دوننماسیله قپودان مشار+الیهك رفاقتنه مأمور اولدی سنۀ مزبوره صفرینك غره+سنه تصادف ایدن روز نوروزدە+كه جمعه ایدی بونلر اوچیوزدن زیاده كمی ایله قبریسه طوغری حركت و اوراده حرب ایتمكده اولان اردوی همایونه كركی كبی معاونت ایتدكدنصكره دونوب دشمن دوننماسنه سدراه اولمق اوزره جزایر یونانیه طرفلرینه كیتدیلر و بعض اطه+لرده و خصوصیله كرید و كفالونیه اطه+لرنده دشمنه كلی خسار ایتدكدنصكره اینه بختی لیماننه كیروب (اناطولیقوز) دنیلان بر بیوك كویك اوكنده و بر صیغ یرده تیمورلدیلر و دشمن دوننماسی بغتةً كلوب چاتمغله طرفین حربه طوتشدی و دشمن دوننماسی بیاغی انهزامه یوز طوتدیسه ده متهورانه حركت ایدن قپودان علی پاشا شهید و اولادی اسیر اوله+رق دوننما قوماندانسز قالدیغندن سردار مشار الیه دخی ناچار قالان عسكر ایله قره+یه و اولوج علی پاشا مهارتی سایه+سنده دوننماسیله ساحل سلامته چیقدی و خیلی دشمن كمیسی حرق و غرق واخذ ایلدیكیچون اولوج عنوانی قلیجه تبدیل اولندی. و بو زمانه قدر اسلام دوننمه+سنده بو درلو انهزام وقوعبولمدیغندن (صنغون) دوننما دیو نام ویرلدی زیرا دشمن یاقوب باتردیغندن بشقه یكرمی بیكدن زیاده جنكجی و كوركجیسیله برابر یوز طقسان پاره اسلام كمیسنی یدكلیوب كوتورمش ایدی پاشای مومی+الیهك ازمیدده مكمل و محتشم بر جامع شریفی واردر.