بدرالدین محمود —
سلطان علاءالدین سلچوقینك برادرینك حفیدیدر و زماننده (ابن القاضی) یاخود (قاضی سماونه) دینكله شهرت بولمش بر فاضل ذیشاندر. پرینك سلطان اورخان زماننده فتح ایتدیكی سماونه نام قصبه+ده هم والی و هم قاضی ایدی صكره دیار مصره كیدوب سید شریف ایله شریك اوله+رق مبارك شاهدن و شیخ اكمل حضرتلرندن و مکۀ مكرمه+ده شیخ (زیلعی) حضرتلرندن تحصیل نسخ و كمالات ایدرك سلطان مصر )فرج بن بر قوق)ه معلم اولدی و بر آره+لق جذبۀ رحمانی استیلا ایتمكله شیخ حسین اخلاطی حضرتلرینك استانه+سنه التجا ایتدی مؤخراً تبریزه واروب تمورلنكك حضورنده بین العلماء تحدث ایدن بر منازعۀ علمیه+نك فصلنه حكم تعیین اولندی داها صكره دیار رومه كلوب شهزاده موسی چلبینك قاضیعسكرلكی خدمتنه كیردی چلبی سلطان محمد حضرتلری برادری شهزاده مومی+الیهه غلبه و ادرنه+ده تخته جلوس ایتدكده شیخ بدرالدینی ازنیق قصبه+سنه نفی ایلدی شیخ بدرالدین دخی ازنیقده ارشاد و تألیفاته امرار وقت ایتمكده ایكن كتخداسی یوركلوجه مصطفی نام كمسه افندیسنك نامنه ایدین ولایتندن بش اون بیك كشی طوپلایوب چلبی سلطان محمد حضرتلرینك علیهنه قیام و روم ایلی طرفنه عزیمت ایتمسیله و بدرالدین دخی علی روایة مصطفانك اشبو حركتنی صكرەدن خبر آله+رق كویا سرپندیسی كندوسنه طوقنمامق ایچون اسفندیار بك نزدینه واروب او دخی پادشاهدن قورقدیغیچون زغره طرفنه كتمسنی اخطار ایلمسیله بدرالدین افلاقه و اورادن
روم ایلی یقه+سنه کچوب و دلی اورمانده كتخداسی مرقوم مصطفی و عسكر ایله برلشوب یاخود عسكر بونی استر استه+مز اوكنه قاتوب ادرنه اوزرینه یوریدی لكن قارشوسنه چیقان عساكر سلطانیه+یه مقاومت ایده+مدیكندن یقایی اله ویروب (١٤٢٠ م و ٨٢٣ ه) تاریخنده برهان+الدین حیدر هروی فتواسیله سیروزده صلباً اعدام اولندی فقهدن (لطائف الاشارات) و (تسهیل) و (جامع الفصولین) و تصوفدن (مسرة القلوب) و (و واردات كبری) نام كتابلر جملۀ تالیفاتندندر. منقولدركه مومی+الیه صلب اولنمزدن اول ایكی ركعت نماز قیلوب دست دعایی دركه باری+یه باز ایتدیكی صره+ده مشایخ كرام حضراتنك عادتلرندن اولدیغی وجهله بدنندن منسلخ اولوب جسدی قوری قالب كبی یره دوشمش و امر شرع شریف یرینی بولسون ایچون جسد بیروحی صلب اولنمشدر