لغات تاریخیه و جغرافیه

Lugat-ı Tarihiyye ve Coğrafiyye

بدرالجمال

بدرالجمال — مصر ملكی مستنصر علوی وزراسندن مستقیم و مدیر بر ذات خجسته صفاتدر. ملك مشار+الیه زماننده ارتكاب اولنان مكاره و معاصینك مجازاتی اولمق اوزره یدی سنه امتداد ایدن قحطدن بر دیلم قوری اكمك اللی التونه چیقمغله اهالیء مصرك حاللری دكركون اولمش و ناصر الدوله+نك وقائد تركینك تغلبلری و سلچوقیلرك سوریه+یی استیلالری جبتیله امور دولت متشتت بر حاله كیرمش اولدیغندن عكا والیسی اولوب سلچوقیلره قارشو طوران عساكر مصریه+نك امیری اشبو بدرالجمال مقام وزارته كتورلدی مشار+الیه كافۀ مشكلاتی برطرف ایدرك و متغلبه+نك حقلرندن كله+رك اسایشی اعاده ایلدی و (١٠٩٤ م و ٤٨٧ ه) تاریخنده وفات ایتمكله رتبۀ وزارتی اوغلی افضله توجیه اولندی.