بخت نصر ثانی —
ایكنجی آثور دولتی حمایه+سنده اولان بابل حكمدار یاخود والیسی (نابو پولاصر)ك اوغلیدر. مرقوم نابوپولاصر (مدیا) حكمداریله متفقاً ولی نعمتی اولان آثور حكمداری اوزرینه عسكر چكدیكی زمان اشبو بخت نصری قوماندان تعیین ایتمشیدی بخت نصر عساكر متفقه ایله كیدوب نینوه+یی خراب و دولت آثوریه+یی برباد و ممالكی ضبط ایلدی ایكی سنه صكره پدرینك فراغیله بابل حكومتنه بالاستقلال حكمدار اولوب قرق اوچ سنه سلطنت سوردی (٤٩٨٨ خ) تاریخنده یعنی میلادك التی یوز التی سنه مقدمنده بلاد یهودیه+یی و حامیلری اولان مصرلولری اوردی و برچوق یهودی+یی بابله نفی و تغریب ایتدی براز مدت صكره عدم اطاعتلرینه بناء ممالک یهودیه+یی اوچ دفعه و مصری بر دفعه دها اوروب اهالی+یی فوق+الغایه خساره اوغراتدی و اون اوچ سنه محاصره ایله (صور) شهرینی آلدی. یهودیلر شریعت موسوی+یه و اون التی نفر انبیای ذیشانه ایتدكلری حرمتسزلكك و ارتكاب ایتدكلری پت+پرستلكك جزاسنی كوردیلرسه ده بخت نصرك ایتدیكی خسارات دخی یاننه قلمدی یعنی آخر عمرنده علت جنونه مبتلا اولارق طاغلره دوشوب نیجه محنت و مشقتله جان ویردی. یهودیلرك بابل و سائر ممالك عراقیه+ده یتمش سنه اسارتی بخت نصرك برنجی استیلاسی تاریخی اولان (٤٩٨٨ خ) سنه+سندن یعنی میلادك التی یوز التی سنه مقمدمندن اعتبار اولنور.