پاسقال —
فرانسه مهندس و مؤلفلرندندر. بونك پدری كمال محبتندن ناشی مرقومی علم هندسه تحصیلندن منع ایتدیكی حالده مرقوم بشقه فنه رغبت ایتمیوب اون ایكی یاشنده استادسز و كتابسز اولارق فن هندسه+ده اوكلیدن اوتوزایكی قضیه+سنك براهین و دلائلنی بولدی و اون التی یاشنده قطوع مخروطیاته دائر بر كتاب یازدی و اون سكز یاشنده حسابات مشككه+یی حل ایدر بر قاعدۀ حسابیه یاپدی و (١٦٥٤ م و ١٠٦٥ ه) تاریخنده مثلثات قواعدینی بولدی و درت سنه صكره خط متمائل التدویرك نظریاتنی ایجاد ایلدی و میزان الهوا حقنده تجربه+لر ایدرك اصلاح و اكمالنه موفق اولدی و هوانك ثقلتنی پارسده (سن ژان) قله+سنده تجربه و اثبات ایتدی (بو تجربه+یه پوی دودوم تجربه+سی دیرلر) نقل میاه و جر اثقال فنلرینه و مسائل دینیه+یه دائر تألیفاتی دخی واردر و ادبیاتده دخی اقراننه تفوق ایتمشدر. اوتوزطقوز
یاشنده اولدیغی حالده وفاتی (١٦٦٢ م و ١٠٧٣ ه) تاریخنده وقوعبولمشدر.