پاروله —
سرلیل دیمكدر سفربر بر اردونك خارج و داخلنه نصب و تعیین اولنان قوللر و قراغوللر و استكشافاته مأمور ضابطلر و ایلرو قراغوللر و قطعۀ مفرزە+لر بربرلرینی طانیوب دشمنك كیجه باصقینندن امین اولمق ایچون اشبو پاروله+یی استعمال ایدرلر پاروله هركون تبدیل و بر بشقه+سی استعمال اولنور و ایكی درلو اولوب برینه (كلام امر) دیكرینه (كلام اجتماع) دنیلور (كلام امر) بر بیوك ذاتك ویا بر مشهور قوماندانك و یاخود شان غزا اغورینه جان ویرن بر شهیدك ویا بر قهرمانك اسمی اولمق اوزره انتخاب اولنور (كلام اجتماع) دخی اکثری بر جنك محلنك ویا بر مشهور شهرك اسمندن عبارت اولور. اردونك قوماندانی مراد ایدر ایسه حكمی برقاچ كون دوام ایتمك اوزره. دخی پاروله تعیین ایدر. عموم اركان حرب رئیسی بولنان ذات اشبو كلاملری ممهور ورقه ایله جناحلره و مركز و احتیاط قوماندانلرینه و صنوف سائرۀ عسكریه آمرلرینه بیلدیرر انلر دخی معیتلرنده اولان امرایه ویررلر و اخشام اولمزدن اول بالجمله قراركاهلره یتشدیررلر اردوكاهدن اوزاق اولان مفرزه و قلعه قوماندانلری دخی بشقه بشقه برر پاروله اتخاذ ایده+بیلور.
اشبو پاروله قید اولنان دفتر ویا ورقه از قضا دوشر ویا دشمنك النه کچر ایسه باش فوماندانك امریله درحال پاروله دكشدیریلوب بر یكیسی چیقاریلور. علیه الصلاة والسلام افندمز دخی غزواتده ایكی طلیعۀ اسلامیه بربرینه تصادفده وشبخونده یكدیكرینی طانیمق ایچون بو كیجه شعاریكز شو اولسون
دیو بر كلمه فرمان بیوررلر ایدی حتی غزوۀ مریسیعده (یامنصور) و غزوۀ احدده (امت امت) و غزوۀ احزابده (هم لاینصرون) امر بیورمشلر ایدی.