ابن علقمی مژیدالدین محمد — خلفای عباسیه+دن مستعصم باللهک
وزیر اعظمیدر. بونك علم و درایت و فطانتنه بر دیه+جك اولمدیغی كبی
شیطنت و خیانتنه دخی نهایت یوغیدی و كندوسی رافضی المذهب اولدیغندن
دائما سنیلرك علیهنده بولنور و روافضی حمایه و سنیلر اوزرینه تحریص ایدر
و بو خصوصدن طولایی بالدفعات ظهور ایدن اختلاللرده سنیلرك روافضه
غلبه+سندن ناشی انلره و ولی نعمتی اولان مستعصمه دیش بیلر ایدی بناءعلیه
نفوذ سلطنتك شیعیلره انتقالی چارە+سنی دوشونه+رك كندوسی بالاستقلال
والی اولمق شرطیله ممالك عراقیه+نك ایران ملکی هلاكویه تسلیمنه قرار
ویروب كیفیتی خفیاً مومی الیهه اشعار و بو بابده تسهیلات كوسترە+جكنی وعد
ایلدی وهلاكو دخی مع المنونیه ایكیوز بیك عسكر ایله كلوب براز
محاربه+دن صكره بغداد خارجنه اردوسنی قوردی و ابن علقمی خلیفه
مستعصمه هلاكو ایله مصالحه ممكندر رخصتكز اولور ایسه كیدر بر چاره+سنی
بولورم دیه+رك كیدوب بر بشاشت فوق العاده ایله كلدی و هلاكونك
مرادی سزك قزیكزی اوغلنه عقددن عبارت ایمش ان شاالله عقددن صكره
مصالحه+یی دخی یپارز دیمسیله بیچاره مستعصم اینانوب موافقت ایلدی
و ابن علقمی درحال وكلا و امرای دولتی طوپلایوب نكاح ایچون هلاكونك
اردوكاهنه كوتوردی و هلاكو دخی خائن مرقوم ایله اولجه قرارلشدیردیغی
وجهله نكاحه بدل جمله+سنك جاننه قییوب عسكریله برابر بغداده كیردی
و قرق كون قتل عام ایدوب اشراف بغدادك كافه+سنی قلیجدن كچوردی.
بو وقعه (١٢٥٨ م و ٦٥٦ ه) تاریخنده و قوعبولمش و یالكز بغداد دروننده
اوچیوز بیك كشینك قانی دوكولمش و قوجه دولت عباسیه منقرض اولوب
سلطنت مغوللره كچمشدر و خائن مرقوم دخی مأمولی كبی والیلكه
نائل اوله+میوب و بقیة السیوف بیچاركانك انكسار و دشنامندن سوقاغه
چیقه میوب برقاچ ای ظرفنده و غم و غصه ایچنده كبرمش كتمشدر.