لغات تاریخیه و جغرافیه

Lugat-ı Tarihiyye ve Coğrafiyye

بارباروس

Barbaros

بارباروس — قرمزی صقال معناسنه اوله+رق اوروپالیلرك جزایرلی غازی قپودان (خیرالدین) پاشایه طاقمش اولدقلری لقبدر و بو لقب هیج بر سببسز اولمیوب (بابا اوروج)ك غلطی اولدیغنده شبهه یوقدر چونكه قپودان مشار+الیه مدللوده پاپوشجی یعقوب نامنده بر كمسه+نك اوغلی و پیشۀ حرب و ضربك اژدر هفت سری مشهور (اوروج غازی)نك كوچك برادری ایدی اشبو اوروچ غازی دائما كمیلر طونادوب قورصانلغه چیقمغی اعتیاد ایتمش و راست كلدیكی فرنك كمیلرینه رامپه ایدرك اق دكزك قسم غربیسنی قوروتمش و جرایر حوالیسنده قلیجیله برچوق یرلر فتح ایدرك اداره+سنی درعهده ایلمش بر ذات اولوب وفاتندن صكره خیرالدین پاشا دخی بر مدت قائمقاملغنی ایتدیكنه بناء اوروپالیلر بیوك برادرینه طاقدقلری بابا اوروج غلطی (بارباروس) لقبنی بوكا دخی ویرمشلرایدی صكره اولكینك نامنی اونودوب لقب مزبوری بونك اوزرنده براقدیلر. فرنكستان ممالك ساحلیه+سی قادینلری چوجقلرینی (بارباروس) دیو قورقودیرلر ایمش. خیرالدین پاشانك احوال سائره+سیچون (خیرالدین) كلمه+سنه دخی نظر بیوریله .