لغات تاریخیه و جغرافیه

Lugat-ı Tarihiyye ve Coğrafiyye

باب فرغانی

باب فرغانی — آدی عمردر كرامات ظاهره صاحبی بر ذات ایدی. محكیدركه مومی الیه بر كون اوطه+سنده اوتورركن ایچرویه بر كیمسه كیره+رك (سركب) نام امیرك فرغانه+یی ضبط ایچون كلمكده اولدیغنی بیاندن صكره دفع بلاسی یولنده دعاسنی رجا ایلدكده شیخ اوكنده بولنان ابریقه ایاغیله اورمسیله (سركب) شهر قپوسنده آتدن باشی اشاغی دوشرك بوینی قیرلدی. بر دفعه دخی خلقك یاغمور حقنده كذلك وقوعبولان مراجعتلرینه مبنی دعاسیله علی الدوام بر هفته باران نزول ایدرك بو كرە ده هركس كثرت باراندن اولری ویران اولمقده ایدوكنی معرض استدعاده درمیان ایلملری اوزرینه تكرار دهنكشای دعا اولمغله یاغمور كسیلدی. اولوقت فرغانه جهتلرنده بیوك شیخلره (باب) تعبیر ایدرلر ایدی.