پاپا —
روما كلیساسنك رئیس روحانیسیدر. عموم قتولكلر پاپایی حضرت عیسی علیه+السلامك وكیلی و حواریونك برنجیسی اولان (سن پتروس)ك خلیفه+سی طانورلر. پاپالر بتون قتولك آییننی كلیسانك رسومنی محافظه ایله برابر عفو عمومی+یه و آفروزه مقتدر اولدقلرینی و بو اقتداره سن پتروس طرفندن مالك بولندقلرینی معلن اولمق اوزره بری التون و دیكری كموش ایكی عدد انختاری حامل اولورلر. پاپالر بیوك (غراغوار)دن صكره خیلی زمان كندولرینی (عبدالعیاد) عنوانیله ذكر ایتدیرمشلر ایدی. برنجی عصر میلادیدنبرو پاپالر یالكز بر اقتدار روحانی+یی حائز و ایمپراطورلر طرفندن منصوب ایكن ایمپراطور قسطنطین طرفندن خصوصات و اعتبارلری تزیید و (٧٧٠ م و ١٥٩ ه)
تاریخنده ایمپراطور (شارلمان) طرفندن بعض ممالك تملیك و احسان اولندیغندن و
(١٠٧٧ م و ٤٧٠ ه) تاریخنده (سن پتروس)ك میراثی تعبیریله بیوك فونته+سی ماتیلدك اراضیسی كلیسایه وقف ایدلدیكندن بیوك اقتداره یعنی حكومت روحانیه+دن بشقه برده حكومت جسمانیه+یه مالك اولدیلر كیدە+رك نفوذلری دائرۀ حكومتلرینی تجاوز و بتون اوروپا دولتلری ممالكنه تأثیر ایدوب نهایت حكمدارلرك عزل و نصبنده و بالجمله مصالح دولیه+ده كندولرینی مرجع طانتدیرمغه قدر ایلرو كتدیلر و بعضلری حكمدارلره ایاقلرینی بیله اوپدیردیلر بو حال بر مدت بو صورتله دوام ایدوب اون برنجی (غراغوار)ك وفااتندن یعنی (١٣٧٧ م و ٧٧٩ ه) تاریخندن صكره ظهور ایدن اختلاف پاپا مسندینك ایكی+یه انقسامنه سببیت ویردی و پاپانك بری روماده اوتوروب دیكری (اوینیون) شهرنده جالس صندالیء حكومت اولدی بو حال دخی یتمش بر سنه دوام ایدوب بو مدت ایچنده
ایكی پاپا بربری علیهنده تحریكاتدن و یكدیكرینك یاپدیغی ایشی رد و تكذیبدن خالی اولمدی بو مناسبتله (غراغوار) زماننده+كی و دها اولكی نفود و اقتدارلری كركی كبی تنزل ایدوب پاپا انتخابی مقدما روما هیئت رهبانیه+سی معرفتیله اجرا اولنور و هیج بر حكمدار طرفندن قاریشلمز ایكن صكره+لری ایتالیا پرنسلری طرفندن تصدیق اصولی میدانه چیقدی دها صكره پاپالرك حكومت جسمانیه+سی یالكز روما شهر و بر قاچ پارچه ملحقاتنه منحصر قالوب (١٨٧١ م و ١٢٨٨ ه) تاریخنده ایتالیا دولتی پای+تختنی رومایه نقل ایتدی پاپالر نصب اولندقدن صكره اسملرینی دكشدیرمك عادات قدیمه+لرندندر و (٣٤ م) تاریخندن شمدی+یه قدر روماده پاپا مسندینه جالس اولان ذواتك عددی ٢٩٦+یه بالغ اولمشدر.