لغات تاریخیه و جغرافیه

Lugat-ı Tarihiyye ve Coğrafiyye

اورلوف

Orlof

اورلوف — روسیه امراسندن بر مشهور ذاتدر. بو آدم ابتدا (استرلیج) اوجاغندن نشئت ایتمش بر یاور اولدیغی حالده كوزللكی سایه+سنده (قترینه)یه یار اولدی و (١٧٦٢ م و ١١٧٦ ه) تاریخنده ایمپراطور اوچنجی (پترو)نك علیهنه سرای اختلالنی چیقاروب قترینه+نك اجلاسنی و پترونك اعدامنی تسهیل ایتدی قترینه دخی تخته چیقدقدن صكره مرقومك خدمت مسبوقه+سنه مكافاة رتبه+سنی ترفیع و بر مدت نفسنه محرم طوتارق فوق الغایه اعتار ایلدیسه ده مرقوم كبر و عظمتندنمیدر یوخسه بشقه بر مطالعه+یه مبنیمیدر اولكی كبی خدمته یناشمدیغندن طرد و تبعید مذلتنه دوچار و ینه عفوله نائل اعتبار اولدی لكن حین غیبوبتده ) پوتمكین) نام جنرالك كندوسنه بدل نائل اولدیغی اقبالی چكه+مدیكندن و قباحت كندوسنده اولدیغی جهتله برشی ده سویلیه+مدیكندن عقلنه خفت كتوروب (١٧٨٣ م و ١١٩٨ ه) تاریخنده وفات ایلدی (١٧٧٠ م و ١١٨٤ ه) تاریخنده روسیه دوننما+سیله آق دكزه كلوب انکلیز امیراللرندن (آلفستون)ك تدیریله چشمه+ده دولت علیه دوننماسنی احراق ایدن روسیه امیرالی اشبو اورلوفك قرنداشی ایدی. بو دخی قترینه+نك سوكیلیلرندن و پترونك قاتللرندن بریدر