آوارین یاخود (آوارون) — موره شبه جزیره+سنده (ارقادیا)
سنجاغی داخلنده و ساحل بحرده مستحكم بر شهردر. دولت علیه بو شهری
(١٤٩٩ م و ٩٠٥ ه)
تاریخنده براً و بحراً محاصره ایدرك امداده كلمش
اولان اوروپا دوننماسی روملره اعانه ایتدیكی حالده ضبط ایلدی و عقیب
فتحده اهالیدن بر طاقمی وندیك عسكریله برابر قلعه دروننده كیزلندكلری
محللردن و پوصولردن چیقوب قلعه+یی تكرار آلدیلر ایسه ده مشهور كمال
رئیس دوننمای همایون ایله ینه كیدوب استرداده موفق اولدی و مقدما
كیزلنان و پوصویه كیرنلردن اوچبیك قدر عسكر و اهالی+یی اعدام
ایتدكدنصكره (انیقه) و (اسوصا) قلعه+لرینی دخی ضبط ایلدی و قلغۀ
مزبوره (١٦٨٤ م و ١٠٩٦ ه) تاریخنده ینه وندیكلولره و اوتوز بر سنه
صكره ینه دولت علیه+یه كچدی و (١٨٢٧ م و ١٢٤٣ ه) تاریخنده موره
سفری مناسبتیله (آوارین) لیماننده یاتمقده بولنان اللی طقوز قطعه دولت علیه
و مصر دوننمه+سندن اللی قطعه+سنی یونانلولره طرافدارلق ایدن و دولت علیه
ایله دوست كچینان انكلتره و فرانسه و روسیه دوننماسی بغتةً كلوب دوستلق
ینه باقی اولمق اوزره احراق و بشبیك قدر عساكر بحریۀ اسلامیه+یی اسیر
ایلدی. بوكا فرنكلر (ناوارین) دیرلر و بو خساره جسارت ایدن
امیرالی كویا یدنده بویله بر امر یوغیدی دیو قباحتلی طوتارلر