آباء — حكما عناصره امهات دیدكلری كبی افلاك و انجمه دخی (آباء) دیرلر و بو تسمیه ایله علویات و سفلیاتك علیت و معلولیت طریقیله یكدیكرینه ارتباطی مسئله+سنه قوت ویرمك استرلر واقعا متكلمین دخی اشبو ارتباطی انكار ایتمزلر لكن تعلیله ده قائل اولمزلر. سیارات سبعه+یی ارباب و مدبرات عالم اعتقاد ایدن یاخود مدبرات عالم دیدكلری روحانیلرك واسطۀ تدبیر و تأثیری ظن ایلیان ارباب عزایم و خواص دخی سیارات مذكوره+یه (آباء) و عناصره امهات دیرلر. نصاری حوارییونه یتشمش اولان و دین (عیسی) علیه السلامی مباحثه و مكاتبه ایله نشر ایدن رسوللره و ایكنجی عصر میلادیدن اون اوچنجی عصر میلادی+یه قدر كلیسانك رأیی اوزره عامل و خادم اولان بیوك پاپاسلره (آباء) تعبیر ایدرلر.