لغات تاریخیه و جغرافیه

Lugat-ı Tarihiyye ve Coğrafiyye

امیر سلطان

امیر سلطان — طریقت علیۀ خلوتیه شعبه+سی اولان )نور بخشیه) طریقی مشایح كرامندن بر بیوك ذاتدر و مسقط رأسی (بخارا) اسمی (محمد شمس الدین)در. مشارالیه بخاراده تحصیل كمال ایتدكدن صكره بروسه+یه هجرت و بر چوق زمان ارشاد عباد و تدریس علومه همت ایدوب سلطان (یلدیرم بایزید خان) حضرتلرینه داماد اولدی و سلطان بایزید مشهور نیكبولی مظفریتی اوزرینه مصرده اقامت ایدن خلفای عیاسیه+دن )متوكل)ك كوندردیكی ) سلطان اقلیم الروم) عنواننی الدقدنصكره اشبو امیر سلطان دخی مشار الیه حضرتلرینه قلیج قوشادوب مصالح ملته اقدام نصیحتیله اعمار ملكه تشویق ایلدی. وفاتی (١٤٢٩ م و ٨٣٣ ه) تاریخنده و تربه+سی بروسه+ده+در