لغات تاریخیه و جغرافیه

Lugat-ı Tarihiyye ve Coğrafiyye

الیاقیم بن یوسیا

الیاقیم بن یوسیا — ایكنجی بخت نصر قدس شریفی اوروب یهودیلری بابله نفی ایتدیكی زمان قدس شریفده یهودا ملكی بولنان ذاتدر. فراعنۀ مصریه+دن فرعون اعرج دیدكلری (نیخوا) (٤٩٨٥ خ) تاریخنده یعنی میلادك التی یوز طقوز سنه مقدمنده آثوریا محاربه+سندن كلوركن آثوریلرك تحت حمایه+سنده اولان قدس شریفی حرباً استیلا و حكمداری بولنان (یاهو آخاز)ی خلع و مصره اسرا ایدوب یرینه اشبو (الیاقیم)ی اجلاس و ممالك یهودیه+یی یوز فنطار كموش و بر قنطار التون ویركویه ربط ایلمشیدی لكن اوچ سنه صكره بخت نصر ینه استرداده موفق اولوب مصرلولره میال اولان مرقوم الیاقیمی و حضرت (دانیال) علیه السلامی و دها برچوق معتبرانی بابله كوندردی و الیاقیم یهودا حكمدارلغی ینه كندوسنه توجیه اولندیغی حالده مرتب اولان ویركویی اعطا و اطاعت ایده+جكنی تعهد ایلدیكندن بخت نصر تكرار نصب و ارسال ایلدیسه ده برقاچ سنه صكره مصرلولره استناداً بتكرار عصیان ایتدیكندن بخت نصر اوچنجی دفعه اوله+رق كلوب قدس شریفی فنا حالده اوردی و الیاقیمی اخذ و قتل و قرندشنی نصب ایتدی یهودیلرك یتمش سنه اسارتی اشبو (الیاقیم)ك نفیندن یعنی (٤٩٨٨ خ)ی تاریخندن اعتبار اولنور. الیاقیمك اصل اسمی (یواقیم) اولدیغی حالده مصر حمایه+سنی قبول ایتدیكی زمان فرعون نیخوا الیاقیمه تحویل ایتمشیدی