اشقودره — روم ایلینك جانب غربیسنده و قره طاغك جهت
جنوبیسنده و وندیك دكزی ساحلنه قریب محلده بر ولایتك مركزیدر.
اشقودره شهر مستحكمی اسكندر رومی زماننده انشا اولنوب مؤخراًً برقاج
دفعه صرپلولرك و وندیكلولرك النه كچیدی و (١٤٧٨ م و ٨٨٣ ه) تاریخنده
سلطان (محمدالثانی) حضرتلری مكمل بر اردو ایله كیدوب ابتدا اطرافنده+كی
طاغلری استیلا و اورالردن قلعه+یی دوكمك ایچون بیوك طوپلر چیقارلمسنی
فرمان ایلدیسه ده ممكن اوله+مدیغندن درسعادتدن باقر و اوسته جلب و طاغلرك
تپه+لرنده بیوك طوپلر اصاغه ایتدیره+رك التی آی محاصره و تضییق ایله آلدی
و (اسكندریه ارنود) نامیله و كتخدالق وجهله روم ایلی ایالتنه الحاق
ایلدی. بونك اوزرینه وندیك دولتی مصالحه+یه مجبور اولمشدر.
(١٨٣١ م و ١٢٤٧ ه)
تاریخنده اشقودره والیسی بولنان مصطفی پاشا
دولت علیه+نك افكار و اراده+سنه مغایر حال حركاتده بولندی دنیله+رك ایالتی
طوغریدن طوغری تحت اداره+یه النوب پاشای مشارالیه درسعادته جلب
و قصوری عفو اولندی.
اشقودره+نك اتصالنده بر بیوك كول واردر و ساحلنده ایشلیان بیوك كوچك
سفینه+لر ایكبیكدن اشاغی دكلدر