آشانتی — آفریقا قطعه+سنك جهت غربیسنده و کینۀ شمالینك
ساحل جنوبیسنده بر زنجی حكمدارلغیدر. بورانك حكمداری بولنان
ذات جوارنده اولان (روی) و (مواسان) و (تاكما) و(قورانزا)
و (توفل) و (دانقاره) و (سایونی) و (آمپانا) و )اكین) و (آسیم)
و سائره ناملریله متعارف یكرمی ایكی عدد امارات صغیره و كبیرۀ زنجیه+یی
تحت اطاعتنه آله+رق اپیجه بر قوت و یوز بیك عسكر چقارمغه اقتدار پیدا
ایتدیسه ده آره صره انکلیزلرك تسلطندن قورتیله+مامقدە+در. حكمدار
مومی الیهك مقر سلطنتی (قوماس) شهریدر بونك ساحلنده اولان (سان
جورج) قصبه+سی انکلیزلرك اوغراغیدر آشانتی اهالیسنه (امة الدهومیه)
واراضیسنه (سواحل الذهب) دخی دیرلر و اهالیء مرقومه+یی بر ملیون
و حمایه ایتدیكی امارات اهالیسیله برابر اوچ ملیوندن متجاوز تخمین ایدرلر.