اثوریا — شرقاً كردستان و شمالاً حربروت و دیار بكر و غرباً
الجزیره و جنوباً بابل اراضیسیله محدود اولان و بعضا بابل و الجزیره دخی
داخل بولنان اراضیء وسیعه+نك اسمیدر. بو اراضینك جهت جنوبیسنده
سامیلر ساكن ایكن (٤٢٩٤ خ) تاریخنده یعنی میلادك بیك اوچیوز سنه
مقدمنده (بلوس) نامنده بر ذات سامیلری طرد ایدرك برنجی اثور دولتنی
تجدید و توسیع ایلدی و یكرمی بش سنه صكره جلوس ایدن اوغلی (نینوس)
دخی پای تختنی توسیع و تزیین ایدوب (نینوه) نامنی ویردی و بابل حكومتنی
اورته+دن قالدیروب (باقتریان) و (مدیا) و )ارمنستان) ولایاتنی تحت
حمایه سنه آلدی. مومی الیهك تجدید ایلدیكی اشبو برنجی اثور دولتی
٤٨٠٦ خ) تاریخنده یعنی میلادك یدییوز سكسان سكز سنه مقدمنده بابل
والیسی (بله زیس) ایله (مدیا) والیسی (ارپاكسس)ك عصیان و غلبه+سیله منقرض اولوب بله زیس شرق و جنوب جهتلرنده ایكنجی آثور
دولتنی و ارپاكسس مدیا دولتنی تشكیل اتمشدر.
٤٨٨٨ خ) تاریخنده آثوریا حكمداری اولان (سناخریب) دخی مدیا
و ارمنستان و سوریه ممالكنی و ممالك یهودیه و مصریه+یی استرداد و استیلا
ایلدی واخلافی خیلی ایشلر كوردیسه ده (٤٩٨٨ خ) تاریخنده بابل
حكمداری بولنان (نابوپولاصر) ایله مدیا والیسی برنجی (سیئاازار)
متبوع مفخملری (سارداناپال) علیهنه قیام ایدرك سرعسكرلری مشهور
ایكنجی (بخت نصر) معرفتیله بیچاره+یی مغلوب و نینوه+یی یغما و تخریب
ایتدكلرندن قوجه ایكنجی آثور دولتی دخی محو و برباد اولدی.
و متعاقباً مرقوم بخت نصر پدری سیئاازارك فراغیله بابل و آثوریا
حكمدارلغنه كچدی و (٥٠٣٤ خ) تاریخنده یعنی میلادك بشیوز التمش
سنه مقدمنده مدیا حكمدارلغنی احراز ایدن مشهور كبخسرو دخی یكرمی
ایكی سنه ظرفنده بابل و آثوریا و لیدیا و نینوه حكومتلرینی كاملاً محو
و ملكلرینی ضبط ایدوب عمومنه بردن (فرس دولتی) نامنی ویردی.
كیخسروك تشكیل ایلدیكی اشبو فرس دولتی تواریخ شرقیه+ده دولت
)كیانیه) نامیله مشهور و متعارفدر