اسماعیل صفوی — شیخ صفی الدین اردبیلی احفادندن و ملوك
ایرانیه+دندر. ابتدا پدری كبی كیلانده شیخلك و بعضاً مریدلریله غزا
اتمكده ایكن (١٥٠٠ م و ٩٠٦ ه) تاریخنده حكومت بایندریه+نك ضعفنی
فرصت اتخاذ و شیخلكی شاهلغه تحویل ایدرك افشار و قاچار و ذوالقدریه
عشائرندن و اجدادی مرید و طرفدارلرندن تدارك ایتدیكی عسكر ایله آق
قیونلیلری و شروانلیلری پریشان و تبریزی استیلا و سلالۀ ملوك صفویه+یی
تشكیل ایلدی ممالك محروسۀ شاهانه اهالیسنی دخی اغفال و جلب
ایچون شیخللك یوزندن دعوتنامه+لر و خلیفه نامنه مفسدلر كوندروب قرمان
اهالیسنی كركی كبی قاندیردی ایسه ده سلطان بایزید حضرتلری حصول
آرزوسنه میدان براقمدی و (یزد) و (اصفهان) طرفلرنده مخالف افكار
و اعتقادی اولنلردن اوتوز بیك قدر علما و سادات كرامی قتل عام ایتدیردی
و امرادن حسین بك نامنده بر قهرمانی تیمور قفس دروننده احراق و مراد
بكی كباب ایلدی. و (١٥٠٨ م و ٩١٤ ه) تاریخنده بغدادی اوروب
بولدیغی سنیلری كسدی التی سنه صكره سلطان سلیم حضرتلری
مشهور چالدیران محاربه+سنی قزانه+رق شاه مشارالیهك زوجه+سیله معشوقه+سی
تاجلی خانمی و بتون خزینه و اشیاسنی اغتنام و خوی و تبریزی استیلا ایلدی
ایسه ده یكیچریلرك سركشلكی مانعه+سیله دها ایلرویه كیده+مدی و شاه
اسماعیل مغلوبیت مذكوره ملابسه+سیله حیثیتنی ضایع ایلدیكنه و اكثر
كردستان ممالكی الندن چیقوب دولت علیه+یه انتقال ایتدیكنه بناء
كدرندن زیاده+سیله شرب خمره مبتلا اوله+رق اوتوز سكز یاشنده و
١٥٢٣ م و ٩٣٠ ه) تاریخنده آخرته كتدی بقای سلطنتی ایچون
امور مذهبیه+یه مداخله ایدرك ملت منجیۀ اسلامیه+یی شیعیلك و سنیلك
تفرقه+سنه دوشوروب الی آخر الایام بدنام اولان بودر.