شمس الدین كرمانی — اسمی محمد بن یوسف بن علی بن سعیدكرمانیدر. علم فقه و حدیث و تفسیر ومعانی و عرییت+ده علامۀ زمان ایدی تولدی (۱۳۱۷ م و ۷۱۷ ه) وفاتی (۱۳۸۴ م و ۷۸٦ ه) تاریخنده+در اولا پدری بهاءالدیندن قرائت ایدوب بعده كرمان جانبنه انتقال ایله امام
عضد وسائر ذواتدن تحصیل علومه اشتغال و مؤخراً دخی شام و مصر قاهره+یه كیدوب اوراده ناصرالدین فارقی و دها بعض فضلادن تعلم علم حدیث ایله تحصیلنی اكمال ایلدكدن صكره بغداده كلە+رك اوراده توطن ایلدی غایت بشوش و متواضع وجمیع اخلاق حسنە+یی جامع بر ذات اولوب سلاطین
زمان برای زیارت خانە+سنه كیدرلر و التماس دعا و نصیحت ایدرلر ایدی تألیفاتی (شرح بخاری) درت جلد (شرح مواقف) (شرح مختصر ابن حاجب) بونی سبعۀ سیاره تسمیه ایلمشدر (شرح فوائد غیاثیه) معانی و بیاندن (شرح الجواهر) (انموزج كشاف) (حاشیۀ تفسیر بیضاوی) سورۀ یوسفه واصل اولمشدر و بونلردن بشقه (كافیه) ده مسئلهء کحله متعلق بر رساله واثار سائره+سی دخی واردر