لغات تاریخیه و جغرافیه

Lugat-ı Tarihiyye ve Coğrafiyye

سقتیا / سیتیا

Skitya / Sitya

سقتیا یاخود (سیتیا) — قدما نزدنده آوروپانك بالجمله شمال شرقیسی و آسیانك شمال غربیسنه شمولی اولان قطعۀ جسیمه+در بو قطعه+نك حدودی معین صورتده اولمدیغندن بعضیلر ویستول نهرینك غربی و طونه+نك شمالی جهتندن بدأ ایله بتون سارماسیایی حاوی اولدیغی حالده شرق و شمال جهتلرینه طوغری غیر معین صورتده امتداد ایتدیكنی و سائرلری كرك سارماسیانك جهت شمالیسنده و كرك (دون) و (دینیپر) نهرلری بیننده واقع اولسون دون نهرینك جهت شرقیسندن آسیای سفلانك داخلنه دكین ممتد ایدوكنی نقل و حكایه ایدرلر. آسیا سیقتیاسی دخی شمالده (ایما اوس)ك اوته+سنده+كی و جنوب شرقیده (ایما اوس)ك بروسنده+كی سقتیا ناملریله ایكی بیوك قطعه+یه تقسیم اولنمش ایدی (ایما اوس) متقدمین طرفندن آسیای علیاده بر بیوك سلسلۀ جباله اعطا اولنان اسمدر بونلره نظراً اشبو سلسله قفقاسیه و (هندكوه) دن بحر منجمد شمالی+یه ممتد اولوب سیقتیایی ایكی+یه تقسیم ایدر سلسلۀ مزبوره الیوم هملایا و بللور جبال متسلسله+سیدر بونلرك تپه+لری قارلر ایله مستور اولدیغندن سانسقری لساننده قارلی معناسنه اولان (ایماو) نامیله تسمیه ایدلمشدر وقتیله بورالرده ساكن بدوی سیقتلر برچوق اوفق قوملره تقسیم اولندیلر شویله كه (ژتلر) (ماساژتلر) (فنوانلر) (استیه+نلر) (تورلر) (ابازیژلر) (باسترانلر) (روقسولونلر) (اغاتیرسلر) (هروللر) (قرالی سیقتلر) (یوشیلر) (یوتلر) غوتلر) (اسلاولر) (آورلر) (بلغارلر) او جمله+دندر. سیقتلرك یافثك اوغلی اولان (ماغو) ویا ماغوس سلاله+سندن اولدقلری توراتده محرردر اولا بونلر اراس و سیردریا یاخود صیهون نهرلری اوزرنده توطن ایدوب فتوحاتلرینی ممالك بعیدە+یه دكین ایصال و آوروپا و آسیانك بر قسمنی تحت اطاعتلرینه ادخال ایلدكدن صكره (۵۹۷۰ خ)دن یعنی میلادك التی یوز یكرمی درت سنه مقدمندن اعتباراً یكرمی سكز سنه ظرفنده بتون آسیای صغرایی و (٥٤٦٨ خ) تاریخنده یعنی میلادك یوز التمش ایکی سنه مقدمنده بلخ و صغد و سائر تركستان ممالكنی ربقۀ انقیاده کچورەرك غانج نهرینه و برو جهتدن مصره قدر كتدیلر. سیروس و برنجی دارا و اسكندر كبی جهانكیرلر بونلری تحت ضبطلرینه کچورمك ایچون پك چوق اوغراشدیلرسه ده نائل اوله+مدیلر بر مدت صكره سیقتیا سارمات و غوتلر کبی اقوام مختلفه طرفندن متعاقباً ضبط ایدلدی. یدنجی عصرده سیقتیایی مقاسمه ایدن اسلاو اوار بلغارلر سیقتیا نامنی اولوقتدنبرو كتب تاریخیه+دن محو ایلمشلردر. یونانیلر سیقت قبیله+سنه (اسكیث) و (سكیتوس) دیرلر )اسقوچیا) لفظنك بو مملكت سكنۀ قدیمه+سی اولان (سقوت)لردن مأخوذ ایدوکی و مورخ (داوسون) حاشیه+سنده (سیقولو) كلمه+سنی (اسلاو) ایله توجیه ایلدیکی بعض روایات تاریخیه+دندر. لاتین مورخ (ژوستین)ك قولنجه سیقتلر مصرلیلردن دها اسكیدر