لغات تاریخیه و جغرافیه

Lugat-ı Tarihiyye ve Coğrafiyye

سیسه+رون

سیسه+رون — رومالولرك اك مشهور خطیبلرندندر( ٥٤٨٧ خ ) تاریخنده یعنی میلادك یوز یدی سنه مقدمنده ایتالیاده (ارپیوم) نام شهرده دنیایه كلوب اك اعلا معلملردن فلسفه+یی و علم بیانی تحصیل ایدرك جربزۀ نطقیه+سی حسبیله آووقاتلغه باشلادی و اهالی+یی صویوب صوغانه چویران (ده+رس) نام پروپره توری اتهامه مأمور اوله+رق مومی الیهك قوت غنا و نفوذینه قارشو دعوایی قزاندی و (٥٥٣١ خ)+ده یعنی میلادك التمش اوچ سنه مقدمنده قونسلوس تعیین اولندقدن صكره (رولوس)+ك تنظیم ایتدکیی اراضی قانوننامه+سنی تصحیح و اصلاح و قاتیلینانك حكومت علیهنده یاپمش اولدیغی اتفاق خفی+یی كشف و ابطال ایلدیكندن سناتو طرفندن وطن پدری عنواننه نائل اولدیسه ده برقاج سنه صکره قاتیلینا طرفدارلرینك غلبه+سیله نفی و اجلا اولنوب اون التی آی صكرە ینه جلب اولندیغندن كلدیكی كون روماده عید مسرت اجرا ایدلدی مؤخراً ٥٥٤٢ خ) تاریخنده یعنی میلادك اللی ایکی سنه مقدمنده كیلیكیا والیلكنه كوندریله+رك اوراده دخی برطقم تنسیقات و منافع عسكریه وجوده كتوردیكندن بین العسا+كر ایمپراطور عنوانیله یاد اولندی. مومی الیهه محاربۀ داخلیه اثناسنده پومپه فرقه+سنه داخل اوله+رق (فارسالا) محاربه+سی اوزرینه بر مدت امور دولتدن كف ید ایتمش و بو اثنا+ده وقتنی فلسفه+یه دائر اولان آثارینی تحریره حصر ایدوب نهایت سزارك ) قتلندن صكره انطوان علیهنه تحویل مرام و فیلیپیق نام تألیفاتنده مرقومی شدتله مظهر توبیخ و دشنام ایلمش ایدی آخرالامر او جرئتنه بناء انطوانك تعیین ایتدیكی قاتللر واسطه+سیله اعدام اولنوب غوغای جهاندن قورتلدی. سیسه+رون تواریخده ضعف طبع و انانیتله معیوب طوتلمش ایسه ده فضل کمالنه برشی دینلمامستدر. وطنداشلری حقنده پك بیوك بر شفقت پدرانه+یه مالك بر فصیح نادر المسالك ایدی. خطبه و نطقلرینی جامع اولان كتابلری الیوم مرغوب و معتبردر