سید قاسم تبریزی — مولانا جامی حضرتلرینك تحقیقاتنه كوره بو ذاتده مشرب توحید غالب اولدیغندن امورنده نظرینی مبدأ طرفنه طوتمش و اعراض و اعتراض بساطنی طوپلامش ایدی اصحاب نفس وهوایه ایلشمدیكندن بر چوق اهل هوا حضورنده اباحة وادیسنده شریعت و سنت سنیه+دن تهاون ایدر و فقط كندوسی بو تهمتلردن پاك و بری بولندیغی كبی مریداننی دخی او مثللولرله اختلاطدن منع ایلرایدی خواجۀ بزرك (بهاءالدین) حضرتلریله كورشمش و( ١٤٣٣ م و ٨٣٧ ه ) تاریخنده (خرجرد) نام محلده وفات ایلمشدر