اسكندر بك — ارنودلق پرنسنك اوغلیدر و اصل اسمی
)ژان قاسترییو)در. بو بك حال شبابنده پدری طرفندن رهن طریقیله
درسعادته كوندرلدیكی جهتله سرای همایونه آلنوب خیلی زمان تربیه
ایدلمش و اسكندر بك نامی ویرلمش و پدرینك وفاتنده دولت علیه تابعیتندن
آیرلمامق شرطیله مملكتنه پرنس تعیین و ارسال اولنمش ایدی بكمز ارنودلغه
وارر وارمز دولت علیه+نك امرلرینه قارشو حركته و (١٤٤٦ م و ٨٥٠ ه)
تاریخنده بتون بتون عصیانه باشلادیغندن سلطان مراد ثانی حضرتلری
موره سفرندن عودتنده ارنودلغه اوغرایوب مقر اداره+سی اولان اقجه حصاری
تضییق و وقوعبولان استرحامنه بناء ینه عفو و ابقا ایلدی و مؤخراً ینه
مسلك تابعیته منافی حال و حركاتی ظهوره كلمسیله (١٤٤٩ م و ٨٥٣ ه)
تاریخنده تكرار عسكر كوندریلوب اقجه حصار و دبره+لر الندن آلندی
و (١٤٦٦ م و ٨٧١ ه) تاریخنده بتكرار عصیان ایلدیكی جهتله آرتق اصلاحی
قابل اوله+میه+جغی اكلاشلدیغندن ممالكی بتون بتون ضبط ایدلدی و كندوسی
ایتالیایه قاچدی