لغات تاریخیه و جغرافیه

Lugat-ı Tarihiyye ve Coğrafiyye

سناخریب

سناخریب — ایكنجی آثور دولتی حكمدارلرندندر (٤۸۸٥ خ) تاریخنده یعنی میلادك یدییور طقوز سنه مقدمنده جلوس ایلدی. عقیب جلوسنده حكمدار سابق (ساراغون)+دن موروث نفوذی ادامه ایچون ملوك متجاوره ایله محارباته باشلادی مؤخراً محمیلرندن ممالك یهودیه ملكی (حزقیا)+نك بعض حركات نابجاسنی و مصر فرعونی (تاراقه) ایله اتفاقنی استخبار ایلدیكندن ابتدا مصر اوزرینه یورییوب اوچ سنه+ده اوراسنی پریشان و برچوق مال اغتنام ایتدكدن صكره قدس شریفه کلوب حزقیایی محاصره ایلدیسه ده (اشعیاء) علیه السلامك و حزقیانك دعاسیله عسکریه طاعون مستولی اولدیغندن برایش كوره+ میوب كمال انهزام ایله رخعته مجبور اولدی مصرده براقدیغی اردو دخی اوق ویای كبی الات حربیه+لرینی بر كیجه ایچنده قطع و برباد ایدن فاره+لر طرفندن فراره اجبارایدلدی. اشبو ایكی وقعه+ده یوز سكسان بشبیك كشیسی تلف اولدیغی و یكرمی التی یاخود یكرمی ایكی سنه حكومتدن صكره باعث وجودی ایكی اوغلنك غدریله آخرته كتدیکی مرویدر. زیر توراتده محرر اشعیا کتابنده محرر اولدیغنه نظراً سنا خریبك دیكر اسمی (ساراغون) اولوب بو حالده بالاده محرر اولان ساراغون بشقه اولمش اولور