لغات تاریخیه و جغرافیه

Lugat-ı Tarihiyye ve Coğrafiyye

اسكندر رومی

İskender-i Rûmî

اسكندر رومی — بوكا اسكندر یونانی. و بیوك علكساندری دخی دیرلر ماكیدونیا حكمدارلرندندر بو ذات (٥٢٣٨ خ) تاریخنده دنیایه كلوب حكیم مشهور (ارسطو)نك تحت تربیه+سنده اون التی یاشنه بالغ اولدقده پدری ماكیدونیا حكمداری (فلیب)ك بیزانس استانبول) محاربه+سنه عزیمتی مناسبتیله یرینه وكیل اولدی و اثنای وكالتنده اطرافده بولنان بعض اقوامی تحت اطاعته الدی و یكرمی یاشنده ایكن پدری وفات ایلدیكندن تخته جلوس ایدوب شاعر دموستنك تشویقیله ماكیدونیا علیهنه قیام ایدن آتنه+لولری و ماكیدونیانك ترقیسنی چكه میان سائر جماهیر متجاوره+یی تهدید ایتدی و مشهور (تب) شهرینی فنا حالده خراب ایدوب جماهیر مرقومه+یی كركی كبی اوركوتدی و پدری زماننده فرس دولتی علیهنه جماهیر یونانیه ایله یاپیلان اتفاقی تازه+لدی و ویردكلری عساكر معاونه+یی ماكیدونیادن انتخاب ایتدیكی عسكر ایله برابر اوتوز درت بیك بشیوزه ابلاغ و جمله+سنك سرعسكرلكنی درعهده ایدرك (٥٢٦٠ خ) تاریخنده یعنی میلادك اوچیوز اوتوز سنه مقدمنده چناق قلعه+سی بوغازندن اناطولی یقه+سندی کچدی و فرس ملكی (دارا)نك غرانیقوس+ده یعنی قوجه چایی دنیلان نهرك كنارنده تحشد ایدن یوز اون بیك موجودلی بر اردوسنی بوزوب آردینه دوشدی و مركز صدراب اولان (سارد) شهر جسیمنی و فریكیا و پافلاغونیا و پیسیدی و سلیسیا ممالكنی استیلا ایدرك (ایسوس)ه واروب دارانك ایكنجی بیوك اردوسنی دخی پریشان و اولاد و عیالنی و خزینه+سنی اخذ و اغتنام ایلدی و ایكی سنه صكره ارمنستان حكمداری (واخه)نك دارا ایله اتفاقنی خبر آلدیغندن اورایی و متعاقباً سوریه و (تیر) و )غزه) شهرلرینی دخی استیلا ایلدی و غزه والیسی ایكی آی قدر مقاومت ایتدیكی جهتله بعد الاستیلا والیء مومی الیهی طوتوب و آت قویروغنه باغلدوب سوركلته+رك آخرته كوندردی و قدس شریفه واردقده یهودیلر بیاض البسه+لر و طنطنه+لرله استقبال و اولجه استدیكی عسكرك كوندریله مامسندن طولایی و قوعبولان قصورلرینك عفوینی استرحام ایلدكلرندن عفو ایدوب مصر یولنی طوتدی و مصرلیلر ذاتاً عجملرك حمایه+سندن ممنون اولمدقلریچون اسكندری كوزل قبول ایتدیلر و اسكندر مصرده راحت ایتمكده ایكن عجملرك اربیلده عسكر طوپلامقده اولدقلرینی خبر الدیغی كبی (٥٢٦٣ خ) تاریخنده یعنی میلادك اوچیوز اوتوز بر سنه مقدمنده اورایه دخی یتیشوب بیچاره دارایی بتون بتون برباد و استرآباده قدر تعقیب ایلدی و فرس صدرابلرندن (بسوس) نامنده بر خائن دارایی قاچار ایكن باقترانده طوتوب اعدام ایلدیكندن اسكندر اورایه دخی عزیمتله خائن مرقومی اخذ و دارانك ورثه+سنه تسلیم ایلدی و سمرقند و خوقند شهرلرینی آلدقدن صكره بخارا شاهنك قزیله ازدواج و بخاراده ارام و بش سنه صكره هندستانك شمال غربیسنده واقع پنجابدن كچه+رك هندستان راچه+سی (پوراوه)یی حرباً اخذ و ینه عفو و احسان ایلدی و هندستانی دخی ضبط آرزوسنده بولندیسه ده زیادە+سیله یورلمش اولان عسكری پكده مواففت ایتمدیكندن و اصرار ایدە+جك اولور ایسه علیهنده بر اختلال چیقه+جغنی اكلادیغندن دونوب سند و بلوجستان طریقیله و صوسز و ایسسز چوللردن درلو مشقتلرله بابله كلدی و بتون دولتلر طرفندن تبریك مظفریت ایچون كلان سفرا و اهالی استقباله چیقدی لكن بیچاره عشرتله وجودینی خراب ایدرك بر بیوك خسته+لكه دوچار اولدیغندن (٥٢٧١ خ) تاریخنده یعنی میلادك اوچیوز یكرمی اوچ سنه مقدمنده خسته+لكنك اون برنجی كونی غوغای جهاندن قورتلدی كندو جنراللرندن (انتی پاتری) یدیله تسمیم اولندیغی دخی مرویدر هر نه حال ایسه مشارالیه جهانده پك بیوك بر نام قزانمشدر و اكر بخاراده الوهیت دعواسنه قالقشدیغی و مجوسیلرك اعتقادینه میل كوستردیكی ایچون نصیحت ویرن خواجه+سی (قالستن)ی اعدام ایتدیرمامش و غزه والیسنی بالاده بیان اولندیغی وجهله تحقیر ایتمامش اولیدی نام جهانكیرانه+سی الی قیام الساعة لکه+سز یاد اولنور ایدی. مومی الیه قالستن مشهور ارستطالیسك منتخب شاكردانندندر محرر اولان اسملرك محللرینه دخی مراجعت بیوریله