اسطخر — شیراز شهرینك شمال شرقیسنده و اللی اوچ كیلو مترو
بعدنده بر شهر قدیمدر. بوراسی وقتیله ممالك ایرانیه+نك اك معمور و معتنا
بر شهری و مدیا حكمدارلرینك پای تختی اولدیغی حالده (١٢٦٤ خ) تاریخنده
یعنی میلادك اوچیوز اوتوز سنه مقدمنده اسكندر رومی طرفندن احراق اولندی
یاخود قضاءً یانوب اندن صكره بر دها رغبت اولنمدی. شهر مزبورده
پك چوق ملوك مقابری و ستونلری موجود و مشهود اولدیغندن شمدی
) چهل منار) نامی ویرلمشدر. اخیراً خط پهلوی ایله یازولی اوله+رق
بولنمقده اولان طاشلردن اكلاشلدیغنه كوره (اسطخر) ملوك ساسانیه+یه
دخی پای تخت اولمش و یدنجی و سكزنجی عصرلرده عربلر طرفندن تخریب
اولنمشدر. شهر مذكورك خرابه+سنی تماشا ایچون كیدن سیاحلر بوراده
خیلی آثار عتیقه كوردكلری كبی برده یكرمی درت مترو طولنده و كول
رنكنده متعدد اولوقلی و اویمه+لی دیركلرله تزیین اولنمش و اطرافنه غریب
صورتلی بر طاقم حیوانات هیكللری یاپلمش بر بنا دخی مشاهده ایدرلر بو
هیكللر وجودلری قنادلی ارسلان و ایاقلری اسب و باشلری قویرجق صقاللی
انسان و باشلرینه تاج كیدیرلمش صورتده ترسیم اولنمشدر. یونانیلر بو شهره
)پرسه پولی) دیرلر ایدی