ابراهیم پاشا — سلطان (سلیمان خان اول) وزراسندن بر مشهور
ذاتدر. بو ذاتك روم ایلی بكلر بكیلكی انضمامیله مقام صدارته كتورلمسی
مصر والیسی احمد پاشانک حسد و نوعما عصیان و خیانتنه سبب اولدیغندن
ابراهیم پاشا كیدوب مصر امورینه نظام ویردی و عودتنده سلطان سلیمان
حضرتلری سوار اولدیغی قدرغه+یه واروب مراسم خوش امدی اجراسیله
و مؤخراًً یاپیلان دوكوننه بالذات تشریف ایله التفات بیوردی و مشهور (مهاج)
سفرنده سردار اوله+رق (وارادین) و امثالی برچوق قلعه+لری فتح ایتدی
و درسعادته عودتنی متعاقب اناطولیده عصیان ایدن (قلندر اوغلی) و (وقابض
ملحد) و (قره قاضی) نام اشقیانك اوزرلرینه كیدوب انلركدخی غائله+لرینی
بتوردیكی جهتله سردارلق عنوانی احسان بیورلدی و شهزادكانك سورختانلری
اثناده سلطان سلیمان حضرتلری پاشای مومی الیه خطاباً (ابراهیم سنك
دوكونكمی مكلف ایدی یوخسه بنمكی می) بیوردقده بنم دوكونم دها مكلف
ایدی دیمسیله پادشاه مفنعلانه اویله ایسه اثبات ایتملیسك بیورمسنه جواباً
اوت بنم دوكونمه ذات شاهانه+لری كبی بر قهرمان زمان تشریف و تلطیف
بیورمشدر مدعامی اثباته بوندن بیوك برهانمی اولور دیدكده پادشاه
فوق الغایه ممنون و محظوظ اولدی (١٥٣٠ م و ٩٣٧ ه) تاریخنده
وقوعبولان المانیا محاربه+سنده مشهود اولان خدمات مقبوله+سنه مكافاة اوسك
قربنده واقغ نمچه و بوغراد قلعه+لری تملیك بیورلدی و اوچ سنه صكره بغداد
سفرینه كیدركن وانی و تبریزی آلدی و دائما حرمت ایتدیكی و بابام دیدیكی
دفتردار اسكندر چلبی+یی بغداد پازارنده صلب ایتدی و بو سفركی موفقیتی
اوزرینه دخی طرف شاهانه+دن (سرعسكر سلطان) عنوانی احسان بیورلدی.
مرویدركه بر كیجه سلطان سلیمان حضرتلری رؤیاسنده اسكندر چلبی+یی
بر النده قایش و دیكر النده بر مقرمه اولدیغی و جبهه+سی نوره مستغرق بولندیغی
حالده كورر و سلطان مشار الیه خطاباً بهی ظالم بونجه خدمات مقبوله+می
نسیان و بر مفسدك سوزینه اعتماد ایدرك بنی نیچون اولدورتدك دیو اوزرینه
یوریمسیله مشار الیه فریاد ایدرك اویانوب كمال تأثرله مغدوریتنی اكلار و اللرینی قالدیروب ) آلهی ابراهیم بو بیكناهی بكا نصل اولدورتدك ایسه سنده ییلنه وارمقسزین جزا+كی بوله+سك) دیو بددعا ایدر و حقیقةً بر سنه+یه وارمقسزین یعنی (١٥٣٥ م و ٩٤٢ ه) تاریخنده ابراهیم پاشا دخی اعدام اولنوب غلطه+ده واقع جان فدا تكیه+سی قربنه دفن اولنور. دولت
علیه ده پاشای مومی الیه كبی شرف و استقلال قزانمش هیج بر وزیر كلمامشدر.