ازمیر — بحر سفیدك جانب شرقیسنده و چناق قلعه+سی
بوغازینك جهت شمالیسنده اناطولینك مشهور اسكله+سی و ایدین ولایتنك
مقر اداره+سیدر. ازمیر شهرنده اوچ عدد كبیر و برچوق صغیر جوامع
و مساجد شریفه و یدی سكز عدد حمام و یكرمی اوتوز مكتب و برقاچ
كلیسا و بر قشله و متعدد چارشو و فرنكخانه و ایدین و الاشهره كیدن
شمندوفرلرك مركزلری و ساحلنده مكمل بر ریختمی و خسته خانه+لری واردر
و اراضیسی غایت منبت و محصولداردر و هر درلو حبوبات و میوه و سبزه
و افیون و بویا و ایپك و پلاموط و زیتون یتیشور وكلیتلو قوری اوزوم
و انجیر چیقار و اهالیسی مسافرین ایله برابر ایكی یوز بیك تخمین اولنور.
ازمیر شهری (٤٥٧٩ خ) تاریخنده یعنی میلادك بیك اون بش سنه
مقدمندن صكرە+جه (ایئونی) اتحادی ممالكندن معدود ایكن لیدیلر
طرفندن تخریب اولنوب اسكندر رومینك وفاتندن صكره (انتی غون)
نام حكمدار معرفتیله اعمار و (لیزیماق) یدیله توسیع اولندی و دها صكره
) پرغام) و روما حكمدارلری یدینه و (١٠٨٤ م و ٤٧٧ ه) تاریخنده
سلچوقیلر یدینه كچوب برقاچ دفعه روملر طرفندن استرداد ایدلدی
و (١٤٠٦ م و ٨٢٨ ه) تاریخنده سلطان مراد ثانی ضبط ایتدی.
ازمیر اهالیء قدیمه+سنك ایاسلوغدن هجرت ایتدیكی و اسكی ازمیر ازمیرك اوچ
بچق كیلومترو كیروسنده اولوب شمدی نا موجود ایدوكی بعض تواریخده
كورلمشدر. ازمیر لیماننك طولی اللی و عرضی یكرمی كیلومترودر.