ازمید — مرمره دكزینك جهت شرقیسنده ینه بو نامله
مشهور كورفزك نهایتنده و ساحل بحرده بر سنجاق مركزیدر. بوراسنی
)سلطان اورخان) امراسندن (اقجه قوجه) نامنده بر قهرمان مدت مدیده
محاصره ایتدیكیچون سلطان مشار الیه حضرتلری (١٣٢٧ م و ٧٢٧ ه)
تاریخنده فتح ایتدكده قهرمان مومی الیهك نامنی ویردی یعنی قوجه+ایلی
تسمیه ایلدی. ازمیدك هواسی جوارنده اولان بتاقلقلر مناسبتیله براز
اغرجه ایسه ده اسكله+سی غایت ایشلك و معتبردر و درت بیك خانه+سی
و سكز جامعی و درت حمامی و بر كوزل چارشوسی و ترسانه+سی واردر
واراضیسی محصولدار و اورمانلری زنكین و معدن صولری اعلادر
و استانبولدن بر شمندوفر ایشلمكده+در.
ازمید (٤٠٣٥ خ) تاریخنده یعنی میلادك بیك بشیوز اللی طقوز سنه
مقدمنده یونانیلرك معرفتیله انشا و ) نیقومیدیا) تسمیه اولندی و (١٢٠٤ م
و ٦٠١ ه) تاریخنده وندیك و فرانسز غاصبلری استانبول ایمپراطورینه
معاونت بهانه+سیله كلوب استانبولی ضبط و لاتین حكومتی تشكیل ایتدكلری
زمان استانبول هبئت حكومتی ازمیده كیدوب اوراده اللی یدی سنه
حكومت سوردی و صكره ینه استانبوله كلدی. دیكر روایته كوره
هیئت مذكوره اولوقت (ازنیق)ی مقر حكومت اتخاذ اتمشیدی