ابراهیم خان بن سلطان احمد اول — دولت عثمانیه+ده اون سكزنجی
پادشاهدر و ولادتی (١٦١٥ م و ١٠٢٤ ه) جلوسی (١٦٣٩ م و ١٠٤٩ ه)
وفاتی (١٦٤٨ م و ١٠٥٨ ه) تاریخنده+در. مشار الیه حضرتلرینك زمان
سلطنتلرنده كرید فتحنه مباشرت و حانیه و رسمو قلعه+لری استیلا اولندی
و قندیه و آزاق قلعه+لری تحت محاصرە+یه آلندی و قزاقلر دولت علیه
حمایه+سنی قبول ایتدی لكن مركز سلطنتنده اولان بعض معاملات اهالی+یه
ظلم و غدر صورتنده كورندیكندن سوز ایاغه دوشدی و یكیچریلر ایله معتبران
علما و اهالی فاتح جامع شریفنه طوپلانوب صدراعظم احمد پاشانك ازاله+سنی
ركاب همایونه عرض ایتدكلری حالده بر تأثیرینی كوره+مدكلرندن ایشی جبره
بندیردیلر و پاشای مومی الیهی كیزلندیكی یردن اخراج و اعدام ایتدكدنصكره
سلطان (ابراهیم) حضرتلرینی دخی خلع ایدرك یرینه یدی یاشنده اوغلی
سلطان (محمد خان)ی چیقاردیلر و برقاچ كون صكره طرفدارلرینك بعض
تشبثاتنی حس ایتدكلرندن بیچاره سلطان (ابراهیم) حضرتلرینی دخی دار
نعیمه كوندردیلر و سرای همایونه زیادە+جه چاتمش و امور دولته قارشمقده
بولنمش اولان جنجی خواجه+یی میخالیجه كوندروب اوراده اولدیردیلر.