مجدالدین فیروز آبادی — مشهور قاموس محیط صاحبیدر
كنیه+سی ابو طاهر اسمی محمد بن یعقوب مسقط رأسی شیرازده فیروز آباد
ملحقاتندن (كازرون) قصبه+سی وفاتی(١٤١٤ م و ٧١٨ ه) تاریخیدر
سلسلۀ نسبی صدیق اكبر حضرتلرینه منتهی اولور یدی یاشنه قدر قرأن
كریمی ازبر ایلدی بعده شیراز بغداد بلاد شرقیه هندیه شام مصر
یمن روم طرفلرنده سیر و سیاحت ایله كیمنده تعلم و كیمنده تعلیم علم و معرفت
ایدوب نهایت معقولات و منقولاتده واصل اقصای درجات اولدی. هر
كزدیكی یرلرده ولاة و حكام طرفلرندن مظهر حسن رعایت اولور ایدی
خصوصا آذربایجان حكمداری شاه شجاع و سلطان مصر اشرف و امیر
تیمور كركانینك غریق لطف و احسانلری اولمش و سلطان بایزید خان تختكاه
بروسه+ده فرمانفرما ایكن كلوب طرف شاهانه+دن فوق النهایه اكرام و التفات
کورمشدر. یمن حكمداری ملك اشرف (اسماعیل) نزدنده ایسه هپسندن
زیاده رعایت كوروب مشارالیهك كریمەسیله تزوج شرفنه نائل و مركز اداره
اولان (زبید) شهرنده یكرمی سنه قدر شیخ الاسلاملقله ممتاز اماثل اولدی
تألیفاتی حد و احصادن بیروندر ازجمله اصل قاموس اولان (اللامع المعلم
العجاب الجامع بین المحکم والعباب) نام تألیفی كه التمش جلدن عبارت
اولدیغی حالده تلخیص ایدوب اشبو تلخیصندن قاموس محیط وجوده كلمشدر
٤ جلد (تنور المقیاس فی تفسیر ابن عباس) ٢ جلد (بصائر ذوی التمییز
فی لطائف كتاب الله العزیز) ١ جلد (الدرالنظیم المرشد الی مقاصد القرأن العظیم) (شرح قطبة الحشاف فی شرح خطبة الکشاف) ٤ جلد (شوارق
الاسرار العلیه فی شرح مشارق الانوارالنبویه) ٢٠ جلد (شرح صحیح بخاری) ٣ جلد (الاسعاد بالاصعاد الی درجه الاجنهاد) ٢ جلد (عدة الاحكام فی شرح عمدة الحكام) دخی جملۀ آثار نفیسه+سندندر. صحیح مسلمی اعلام محدثیندن ناصرالدین ابو عبدالله محمد بن جهبل حضرتلرندن بطریق
الضبط والاتقان اوچ كون ظرفنده قرائت و اخذ ایلدیكنی كندوسی اشبو
ابیاتنده اشعار و بیان ایتمشدر
قرأت بحمدالله جامع مسلم * بجوف دمشق الشام جوفاً لاسلام
علی ناصرالدین الامام ابن جهبل * بحضرة حفاظ مشاهیر اعلام
وتم بتوفیق الاله و فضله * قرأة ضبط فی ثلاثة ایام