آدم علیه السلام — ابنای بشرك برنجی پدری و نشئۀ
عنصریه+ده انبیاء كرام علیهم الصلوة و السلام حضراتنك اقدمیدر
جناب خالق لایزال حضرت آدمی روی ارضده ید قدرتیله بالچقدن خلق
و ایجاد و جنت اعلایه ادخال بیوردقدن صكره ظاهرده صادر اولان زله+یه
و حقیقتده نوع بنی بشرك ظهوری حكمت بالغه+سنه مبنی دنیایه چیقاردی
و حضرت مشارالیه هند شرقیده بر مدت نعم جناندن دور و حضور
حضرتدن مهجور اولدیغیچون بكا و تضرعله امرار وقت ایدوب علی
روایةً یوز سنه صكره مکۀ مكرمه اراضیسنه كلدی و امر الهی ایله کعبۀ
مكرمه+یی یاپوب تعلیم ملائکه ایله طوافه باشلادی و جنت اعلاده رفیقه+سی
اولان حضرت (حوا)یی مزدلفه نام محلده بوله+رق مسرور اولدی
و براز مدت صكره عهد و میثاق وقوعبولدی و حرف هیجا و اسرار اسماء
وسائر معارف آلهیه+یی جامع اون عدد صحف جلیله احسان بیورلدی.
حضرت آدم علیه السلامك طقوز یوز اوتوز سنه+دن عبارت اولان مدت
حیاتنده حضرت حوادن بری قز دیكری اركك و توأم اولمق اوزره قرق نفر
اولادی دنیایه كلمش و اولاد و احفاد و احفاد احفادی قرق بیكه بالغ اولمش
و هابل و قابل وقعه مكروهه+سنی كورمشدر.
حضرت آدمك قبری میناده مسجد الحنیفده یاخود جبل ابی قبیسده بر مغاره
دروننده+در
خلقت ادم ایله میلاد عیسی علیهما السلام بیننده كچون زمان حقنده روایتلر
پك چوق اولوب بعضیلرینك قولی (تاریخ) كلمه+سنده كوسترلدیسه ده
صحیح نظریله باقیله مز زیرا هیج بریسی بر سند قوی+یه مستند دكلدر
هابل و قابل كلمه+لرینه دخی مراجعت بیوریله
نوع بنی ادمك اصلی (ابیض) و (اصغر) و (اسود) یعنی (قوقاس)
و (مغولی) و (زنجی) ناملریله اوچه تقسیم اولندیغی حالده نوعلری زیرده
كورلدیكی اوزره اولمق لازم كلور
زنجی |
مغولی |
قوقاسی |
كافرستان اهالیسنك نسلی | تاتار نسلی | هند-اوروپا جنسی |
سودان نسلی | چینلولرك نسلی | عرب نسلی |
هوتانتو نسلی | ملزلر | قدیم اسپانیالولرك نسلی |
حبش نسلی | آمریقالولرك قسم اعظمی | فنیانلرك نسلی |
اوقیانوس اطه+لرینك اهالبسی | | مجار نسلی |
تخمینات اخیره اوزره قطعات خمسه+ده موجود اولان نوغ بنی ادم
اسلام | ٢٣٠٠٠٠٠٠٠ |
اورتودوقس | ٨٠٠٠٠٠٠٠ |
قتولك | ٢٠٠٠٠٠٠٠٠ |
پروتستان | ٦٠٠٠٠٠٠٠ |
موسوی | ٤٠٠٠٠٠٠ |
بودا | ٣٦٠٠٠٠٠٠٠ |
براهمه | ٨٠٠٠٠٠٠ |
پت پرست مجوسی و سائره | ١٦٠٠٠٠٠٠٠ |
| ١١٠٢٠٠٠٠٠٠ |