فارابی — مشاهیر حكملی اسلامیەدن اولوب كنیە+سی ابو نصر
اسمی محمد مسقط رأسی ماوراءالنهرده (فاراب) شهریدر مصر و شام
طرفلرنده سیاحت و تحصیل علوم ایچون بر اره+لق دخی بغدادده اقامتله
نهایت شام شریفده توطن ایلدی. ارسطونك كتابلرندن مسائل فلسفیه+بی
اخذ و نشر ایلدیكنه بناءً معلم ثانی لقبنه مظهر اولمشیدی یتمش قدر لسانه
وقوفنی روایت ایدرلر. علم موسیقیده استاد كل اولوب آلات طربدن اولان
قانونی بو ایجاد ایلمشدر (الملة الفاضلة) كتابنده نفوس شریرەنك بعد الموت
آلام ناتناهیه+ده قاله+جغنی معترف اولمشیكن (سیاحت مدینه) ادلو دیكر بر
كتابنده بونلری (نفوس شریره+یی) كائن لم یكن اعتبار ایدوب انجق نفوس
خیرە+نك بقاسنه قائل اولمش و امر سعادتی یالكز حیات دنیایه منحصر طوتمشدر
علوم و صنایعك توسیعنه كمال خدمتندن ناشی موجد هر فن صاییلور
و قوۀ مدركه+نك درجۀ اولیسنه مالك اعتبار اولنور ایدی. سوریه
حكمداری سیف الدولەنك دعوتنه قارشو عدم اجابتله روبراه فرار اولدیغی
اثناده قطاع طریق طرفندن تلف ایدلدیكنی نقل ایدرلر دیكر روایتده
مشارالیهك سراینده برچوق وقتلر اوتوروب (۹۵۰ م و ۳۳۹ ه) تاریخنده
و سكسان یاشنده وفات ایلمشدر
ارسطونك اقوال حكمیه+سنی عربلر بیننده ابتدا نشر ایدن بودر باشلیجه
ایكی تألیفاتندن بری كلیات علومه و دیكری موسیقی+یه دائر اولوب كندو خط
دستیله یازدیغی نسخه+لری الیوم اسپانیا شهری كتبخانه+سنده محفوظدر و سائر
بعض تألیفاتی دخی (۱۶۳۸ م و ۱۰۴۸ ه) تاریخنده پارسده نشر اولنمشدر (فصوص الحكمه) نامنده بر كتابی و تصنیفات سائره+سی دخی واردر