لغات تاریخیه و جغرافیه

Lugat-ı Tarihiyye ve Coğrafiyye

غال امارتی

Gal Emareti

)غال امارتی — انكلیزلر نزدنده (وود) قدماجه (قامبریا بیوك بریتانیاتك قطعۀ غربیسنده بر ناحیە+در شمالاً ایرلانده دكزی غرباً سن ژورژ قنالی جنوباً بریستال قالی شرقاً مونمون هریفور شورپ شستر قونتلقلریله محدوددر طولاً ٦٥ عرضاً ١٤٠ كیلومترو اتساعنده اولوب سلت جنسندن بر ملیون ایكی یوز بیك نفوسی جامعدر. امارت مذكوره اون ایكی قونتلغه تقسیم اولنمشدر و هواسی شدتلی صغوق ایسه ده صاغلامدر و طاغلری بتمز درجه+ده معدن كمورلرینی حاویدر. التون کموش باقر قورشون تیمور معدنلری كثرت اوزره بولنور زراعت آز بر درجه+ده و صناعتی معدن و فانیله اعمالاتندن عبارتدر. اهالیدن طاغلرده ساكن بر فرقه قدیم سلت لسانندن منشعب بر لسانله تكلم ایتدكلری كبی اخلاق قدیمه+لری اوزره متخلقدرلر. غال امارتی بریتانیای بریدن نشأت ایدن غاللو كیمریس مهاجرلری طرفندن اعمار ایدلدیكندن غال نامنی المشیدی. رومالیلر بورایی ضبطه بر قاچ دفعه قویولدیلرسە ده موفق اوله+میوب (٤١١ م) تاریخنده بریتانیای كبیری ترك ایتدكلرنده اهالیسی زمام حكومتی (پن دراغون) تسمیه ایتدكلری بری یدینه ویردیلر و انكلیز ساقسونلرینی و دانیارقە+لیلری و نورمانلری بر بری آردنجه دفع ایدوب (١٢٨٣ م و ٦٨٢ ه)ده برنجی ادواره تبعیته مجبور اولدیلر فقط كاملاً انكلتره+یه التحاقلری سكزنجی هانری زماننده+در (١٥٣٦ م و ٩٤٣ ه)ده ایكنجی ادوار اوغلنه پرنس دوغال نامنی اعطا ایلدی اولوقتدن برو انكلتره قراللری ایلك اوغللرینه بو نامی ویرمكده+درلر