عبدالله بن زبیر بن العوام — حضرت حسین رضی الله عنهك
شهادتی مناسبتیله شام ملكی یزیده بیعت ایتمیان و بتون حجاز و یمن و عراق
و خراسان و حرمین ولایاتنی سكز اون سنه قبضۀ تصرفنده طوتان ذاتدر
كنیه+سی ابوبكر بر روایتده ضم خاء معجمه ایله ابو خبیب اولوب كندو
صحابی و پدری دخی صحابی و عشرۀ مبشرەدن و اناسی ذات النطاقین اسما بنت
ابی بكر الصدیق+در (رضی) هجرتدن یكرمی آی مرورنده و بعض قولده هجرتك
ابتداسنه سنده مدینۀ منوره+ده تولد ایلدی بعد الهجره یهودیلر (بزاهل اسلامه
سحر ایتدك من بعد چوجقلری اولماز) دیو كفتكویه باشلادقلری بر زمانده ابتدا
ابن زبیر تولد ایتمكله اهل اسلام بغایت مسرور اولمشلر ایدی حضرت
پیغمبر افندمز مشار الیه بالذات جد عالیلرینك اسم و كنیە+سنی ویردیلر صیام
و قیامه فرط دوامی و بین الاقوام شجاعتده شهرت تمامی وار ایدی یزیدك
هلاكندن صكره (۶۸۳ م و ۶۴ ه) تاریخنده اهل حجاز و یمن و عراق
و خراسان كندویه بیعت و اطاعت ایدوب مصر و شامدن بشقه خارج ربقۀ
اطاعتی بر محل قالمامشیدی معاویه بن یزیدك وفاتندن صكره ایسه مصر و شام
سرآمدان امراسندن ضحاك بن قیس الفهری و حمصده نعمان بن بشیر
و قنسرینده زفر بن حارث كبی اك معروف ومتنفد ذاتلر دخی داخل حوزۀ
بیعتی اولوب سوزك طوغریسی بخل مفرطی وضعف رأیی اولمسه ایدی بتون
ممالك و بلدان منتظر امر و فرمانی اولمش كیتمشیدی حتی مروان بن الحكم
مدینه+دن چیقوب اتباعی ایله شامه واردقده خلق شامده ایكی فرقه اولوب
یمانیه مروانه و قیسیه ضحاكه اتباعاً ابن زبیره بیعت ایتدیلرایدی انجق مشار
الیه ذكر اولندیغی وجهله ضعف رأیندن ناشی یكدیكرینی تعاقب ایدن اشبو
فرصتلردن بر استفاده ایده+میوب بالآخره مروانیلره كوز آچدیردیغندن نهایت (۶۹۱ م و ۷۲ ه) تاریخنده شامده خلیفه بولنان عبد الملك عراق اهالیسی
كندوسنه طرفدار بولمسیله اولا اول طرفلری امر و فرماننه رام و بعده ججاج
ظالم و طارقی عبدالله بن زبیرك اوزرینه كوندرەرك نیجه محارباتدن صكره غلبه
ایدوب مشارالیه حضرتلرینی اخذ و اعدام ایتدیردی