ابراهیم خلیل الله — اولوالعزم پیغمبران ذیشاندندر ٣٤٧٢ خ تاریخنده یعنی میلادك ایکی بیك یوز یكرمی ایکی سنه مقدمنده ارض كلدانده
واقع اورفه شهری جوارنده (كوثا) نام محلده دنیایه كلدی و سنی یتمشه
بالغ اولدقده من طرف اه مأمور اولدیغی اوزره اهالی+یی دین حقه دعوته
و پرستش ایتدكلری اجرام سماویه+نك مخلوقیتنی و اه عظیم الشان حضرتلرینك
وحدانیت و كبریاسنی بیان و تفهیمه باشلادی و اهالی كوردكلری بونجه معجزات
باهره و نصایح جلیله+یه قارشو مشارالیهك الحادینه حكم ایدرك كیفیتی نمروده
خبر ویروب آلدقلری مساعده اوزرینه آتشه اتمق استدیلرسه ده نار
بعنایاة اه مبدل كلزار اولدیغندن موفق اوله+مدیلر و حضرت (ابراهیم) دخی
ارتق اورالرده طورمیوب اولاد و عیال و درتیوزدن متجاوز خدمه
و منسوباتیله (حران) قصبه+سنه هجرت و پدری (تارح)ك وفاتنه دكین
اوراده اقامت ایلدی و اندن برقاچ سنه صكره قحط مناسبتیله مصره كیدوب
ینه ارض كنعانه كلدی و یكنی (لوط) علیه السلامی (سدوم) نواحیسنه
كوندروب كندوسی (مامبری) صحراسنده (حبرون) نام محلده قالدی
و متعلقاتی بیننده منعقد مقاوله+یی تخطر و تطهر ایچون امر ختانی اجرا بیوردی
و ٣٥٥٨ خ) تاریخنده یعنی میلادك ایكبیك اوتوز التی سنه مقدمنده
جاریه+سی هاجردن حضرت (اسماعیل) و مؤخراًً زوجه+سی جناب سارە+دن
عقیم اولدیغی حالده حضرت (اسحق) علیهما السلام دنیایه كلدی و حضرت
ساره هاجری قسقانوب تبعیدینی مراد و اصرار ایلدیكندن حضرت ابراهیم
ناچار هاجر ایله اوغلی حضرت اسماعیلی كوتوروب مكۀ مكرمه+نك اولدیغی
محله براقدی و بر مدت صكره كورمك ایچون كیدوب برلكده كعبۀ مكرمه+یی
یاپدی و (٣٦٤٧ خ) تاریخنده یعنی میلادك بیك طقوز یوز قرق یدی سنه
مقدمنده یوز یتمش بش یاشنده اولدیغی حالده وفات ایدوب خلیل الرحمانده
واقع مغاره+یه دفن اولندی.
حضرت ابراهیم علیه السلامك سلسلۀ نسبی طقوز بطنده (ارفخشد) بن سامه
واصل اولور و كندوسی اوچ قومك جدی صاییلور برنجیسی مخدوم
عالیلری حضرت (اسحق)ك اوغلی حضرت (یعقوب) علیه السلامدن تشعب
ایدن (بنی اسرائیل) ایكنجیسی مخدوم عالیلری حضرت (اسماعیل) علیه السلامك مكۀ مكرمه+ده (جر هم ) قبیله+سندن آلدیغی قزدن تولد و تشعب
ایدن (عرب مستعربه) اوچنجیسی اخیراً قبائل تركدن آلدیغی قطورا نام
قزدن تولد و تشعب ایدن (مادیلر)دركه حضرت ابراهیم حیاتنده بونلری
یعنی قطورادن اولان اولادینی اموال كثیره اعطاسیله شرق طرفنه
كوندرمشیدی.
)اورفه) كلمه+سنه دخی نظر بیوریله .