عباسیه — (۷۴۹ م و ۱۳۲ ه) تاریخنده دولت امویه+نك
انقراضیله یرینه قائم اولان دولت جدیدۀ اسلامیه+نك نامیدركه مؤسسی
ابا مسلم خراسانی نام قهرمان شهامتعنواندر بو قهرمان دولت امویه+یی محو
و منقرض ایتدكدن صكره عم رسول حضرت عباس سلاله+سندن ابوالعباس
سفاح)ی عراقده سریر خلافته اجلاس ایلمشیدی
دولت عباسیه+ده كلان خلفا اللی التی نفر ذواتدن عبارت اولوب بونلردن
اوتوز یدی نفری تاریخ مذكوردن (۱۲۵۷ م و ۶۵۶ ه) تاریخنه قدر
عراقده و اون طقوزی (۶۵۹ ه) دن (۱۵۱۷ م و ۹۲۳ ه) سنه+سنه
دكین مصرده متعاقباً جالس تخت سلطنت اولمشلردر
راضی بالله)دن صكره كلان بغداد خلفاسنك سلطنتی اكرچه بعض امرا
و افراد عسكریه تغلبیله همحال انقراض اولدیسه ده اقتدار روحانیلری
زوال بولمیوب ینه رسماً تخته اجلاس اولنورلر و امیرالامرا طرفندن
منصوب ولاتی حضورلرینه قبول ایدرلر و حمایه+ده اولان حكومات
متجاوره+یه یازیلان فرمانلری امضالرلر ایدی مشهور اولنلرینك اسملرینه
و (ابا مسلم) و (ابن علقمی) كلمه+لرینه دخی نظر بیوریله