زین العایدین بن امام حسین رضی الله عنهما — ائمه اثنی عشرك دردنجیسیدر و كنیه+سی (ابو محمد) اسمی (علی الاوسط) اولوب ولادتی (٦٥٦ م و ٣٦ ه) تاریخنده و وفاتی (٦٩٤ م و ٧٥ ه)دە+در كربلا وقعۀ دلسوزنده پدرلری جناب (حسین) شیرینمذاق شهد شهادت اولدیغی وقت معیتلرنده بولنان اصحاب و انساب نبوت دخی باجمعهم سربریدۀ سیوف اهل ضلالت اولوب ذكوردن یالكز اشبو نور چشم یقین امام (زین العابدین) حضرتلری قالمش و مزاج شریفلری متغیر اولدیغی حالده مخدرات اهل بیت ایله عریان و پریشان جانب شامه كتورلمش ایدی انواع اهانت و حقارتله حضور یزید ملعنت مزید چیقارلدقلرنده اتباع یزیددن بریسی (كیف اصبحتم یاعلی ویااهل بیت الرحمة) دیو سوال ایتمكله امام (اصبحنا من قومنا بمنزلة قوم موسی من آل فرعون یذبحون ابناءهم و یستحیون نساءهم فلاندری صباحنا من مسائنا و هذامن حقیقة بلائنا) بیورمشدر. امام زهری (بن امام زین العابدیندن افضل بر قرشی كورمدم) بیوردی. مشار الیه حضرتلری فی الواقع فضائل انسانیه+یی بحق جامع اولوب روایت موثوقه+یه نظراً كونده بیك ركعت نماز قیلاردی. والده+لری آخر ملوك عجم (یزجرد)ك اسیر دوشن دختر پاكیزه+سی ایدی زین العابدین حضرتلرینك طقوز اركك و طقوز قز چوجقلری دنیایه كلوب فرزندلرندن التیسی یعنی امام (محمد باقر) (عبدالله) (زیدشهید) (عمر اشرف) (حسین اصغر) و (علی اصغر) حضراتی كندولرندن صكره باقی قالدیلر.