زنون — حكمای یونانیه+دندر. (٥١٣٩ خ) تاریخنده یعنی میلادك اوچیوز اللی بش سنه مقدمنده قبریسده تولد ایدوب بر مدت تجارتله مشغول اولدی وكركی كبی ثروت قزاندیسه ده صكره افلاسه چیقدیغندن چكیلوب ابتدا كلبیون طریقنه و مؤخراً افلاطون مسلكنه سلوك و تحصیل علوم ایدرك بر مذهب مخصوص اختراع ایلدی و تلامذه+سنه رواق معناسنه اولان (ستوأ) نام محلده درس ویردیكی ایچون مسلك و مذهبنی قبول ایدنلره (رواقیون) یاخود (فرقۀ اسطوانیه) تسمیه ایدلدی. بونك اعتقادنجه سعادت و حریت و ثروت و سلطنت هب اصلاح حالدن عبارت اولوب آنك فوقنده خوش و لزیذ و نافع بر شئ یوقدر و صلاح
و استقامتدن بشقه بر نسنه خیر عد اولنمز و فساد و ضلالتدن ماعدایه شر دینلمز مقصد تهذیب اخلاقدر و كافۀ علوم آنك تحصیلی ایچوندر و حظوظات نفسانیه روحك مرض و عیبیدر و حق تعالی هر یرده موجود و بالجمله مكوناته حیات بخش ایدر بر اصل ناری اولوب روح دخی بر نوع ریح حاره و مادۀ ناره+در.