زنكبار — بحر محیط هندی ساحلنده بر اطه+نك و بو اطه ایله ساحلاً پورتكیزلرك حمایه+سنده بولنان موزامبیق حدودنده واقع (دلفادو) برونندن (عجان) حدودینه قدر ممتد اولان ممالكه حكم ایدن حكومتك اسمیدر اراضیسی شمالدن جنوبه ایكبیك درتیوز كیلومترو اتساعنده و نفوسی (ماغادوكسو) (مه+لند) (كیلوا) كبی بر طاقم كوچك حكومتلره تابع اولدیغی حالده بشیوز بیك ایله یدی یوز اللی بیك اره+سنده+در مركز حكومت مومباس نامنده بر كوزل لیمانی و یكرمی بیك نفوسی حاوی اولان )زنكبار) یاخود (ساویسل) شهریدر مسكت امامی بو قطعه+نك بر قسمنه تصرف ایدر صیق اورمان و صحرالری و مرتفع طاغلر ایله متعدد ایرماقلری واردر صیجاغی شدتلی و حبوبات متنوعه و پرنج چوید یمش پموق بر نوع چام ساقزی كبی محصولاتی بركتلیدر التون كومش باقر تیمور معدنلری دخی بولنور اهالیسی كافرستان لساننی تكلم ایدرلر و اكثریسی دین اسلام و اولاد عربدن اولوب مستقل بر حكمدارك زیر ادارە+سنده بولنورلر زنكبار حكومتی (١٦٩٨ م و ١١١٠ ه) تاریخنده پورتكیزلرك حمایه+سندن حرباً قورتیلوب بالاستقلال اداره اولنور ایكن (١٨٥٦ م و ١٢٧٣ ه)ده مسكت امامتی طرفندن زیر حمایه+یه آلنمش و (١٧٨٤ م و ١١٩٩ ه) تاریخنده زنكبار حكمدارینك وفاتنی متعاقب ینه استقلالنی قزانمشدر بر روایتده زنكبار حكمداری بالاده تحدید اولنان و زنكبار سواحلی دنیلن محللرك یالكز بر مقدارینه تصرف ایدر (حكومات) كلمه+سنه دخی نظر بیوریله.