لغات تاریخیه و جغرافیه

Lugat-ı Tarihiyye ve Coğrafiyye

زبور

Zebur

زبور — كتب اربعۀ سماویه+دن بریدر بو كتاب جناب حقك عظمت و كبریاسنی و بنی اسرائیلك بونجه خطا و عصیانلریله برابر نه صورتده مظهر عفو و مرحمت اولدقلرینی و برچوق مناجات و استعانات و تسبیحات و آلهیاتی جامع یوز اللی عدد (مزامیر)دن عبارتدر یونانیلر زبوره (پسلموس) دیرلر كتاب مزبور (داود نبی) علیه السلامه نازل اولدی مشارالیه و اخلافنك معتقدلری مزامیر مزبوره+یی مقامات مخصوصه و بوریلر ایله اوقورلر ایدی فرانسز شاعرلرینك اك مشهوری اولان (ژان راسین) و (ژان پاتیست روسو) و دها بشقه+لری شعرلرینی زبوره تقلید ایتمك استه+مشلردر یهودیلر وقتیله مزامیر مزبوره+یی بش كتابه نقسیم ایدوب یوز طقوزنجی مزموردن یوز اوتوز دردنجی مزموره قدر یكرمی بش عددینی اسارت شرقیه+دن اطلاق اولندقلری وقت بر یوكسك یره چیقوب بر آغزدن اوقودقلریچون لسان عبرانیده یوكسك یر معناسنی افاده ایدن نامله و اعتراف ذنوب و استعفای قصور ایچون اوقودقلری ( ٦ / ٣١ / ٣٧ / ٥٠ / ١٠١ / ١٢٩ / ١٤٢)نجی مزمورلری زبور استغفار نامیله یاد ایدرلر قتولك و پروتستان كلیسالری دعالرنده دخی بعض مزامیر واردر