ژان دارق — فرانسه+ده (پوسه+ل دورله انس) لقبیله ملقب بر مشهوره قهرماندر بو قز عادی بر كویلی صلبندن دنیایه كلوب اون سكز یاشنه قدر رعی مواشی ایله مشغول ایكن اولوقت فرق داخلیه و انكلیزلر طرفندن دوچار تزلزل اولان وطننی ایادیء اعدادن تخلیص ایچون كویا باالهام مأمور تعیین اولنمغله یدنجی شارل نام فرانسه قرالی نزدینه كیدرك حائز اولدیغی مأموریت غیبیه+سنی بیان و قرالی بر كوچك تجربه ایله اقناع ایلدیكندن زیر قومانداسنه بر مقدار عسكر ویریلوب بو نلرله (١٤٢٨ م و ٨٣١ ه) تاریخنده انكلیز عساكری طرفندن محصور اولان (اورلیان) شهرینی سكز كون ظرفنده قورتاردیغندن حقنده امنیت عامه حاصل اولمغله معیتنه بر قول اردو دها اعطا اولنوب بونلرله دخی دشمن طرفندن اشغال ایدیلان برچوق موقعلری استرداد و (پاته)ده تابویه غلبه ایتمكله قرال تقدیس آییننی اجرا ایلدی و مرقومه ارتق ایشم بتدی دیه+رك چكلمك استدیسه ده قرال پك چوق رجا ایله بورغونونلرك و انكلیزلرك محاصره ایلدكلری قومپانیه اوزرینه دخی كوندردیكندن بیچاره كیدوب بو محاربه+ده انكلیزلرك النه اسیر دوشدی و التنجی هانری نام انكلتره قرالنك چراقلرندن (قوشون) نام پسقپوسك تحت ریاستنده متشكل بر محكمه+ده ساحره اولدیغنه حكم ایدیله+رك حیاً احراق اولندی. فرانسه+ده نامنه بعض هیكللر ركز اولنمشدر.