روسو (ژان ژاق) روسو — فرانسه+نك مشهور مؤلفلرندندر (١٧١٢ م و ١١٢٤ ه) تاریخنده جنوه+ده بر ساعتجی صلبندن دنیایه كلدی. اولا دفتر خانه كاتبی مؤخراً حكاك چراغی اولدقدن صكره قتولك مادام (وارنس)ك التزامیله (تورین)ده عقائد دینیه تعلمنه مخصوص بر مكتبده خیلی زمان درس كوردی و مكتبدن خروجنی متعاقب (لوازن)ده موسیقی اوكرنوب مادام مومی الیهانك دائرە+سنده بر نیجه ایام قالدی و سكز سنه صكره لیون شهرینك بیوك مدیری موسیو (مابلی) نزدنده معلم اولوب بر سنه صكره فن موسیقیده اختراع كردە+سی اولان اصولی تعلیم ایلدی و پارسده اهالینك سربستیسنی متضمن قلمه آلدیغی (معاهدۀ مشتركۀ بشریه) نام كتابله تعلیم و تربیه+یه دائر (امیل فلسفی) نام روماننی میدانه قویوب اشبو (امیل)ده بتون وحی و الهاماتی رد و جناب حقدن غیریسنه ایمان ایتمامك مذهبنی توصیه ایله طریق معروفی سد ایلدیكندن پارلمنتونك امریله كتابلری آتشه آتیلوب كندوسی كوج حال ایله (نوفشاتل) امارتنده كائن (موتیه تراور)ه التجا و اوراده كمر ًباغی یاپمغه چالیشه+رق غایت عحیب بر طرزده تعیشه اعتنا ایلدی. مؤخرا اسویجرە+یه و (١٧٦٦ م و ١١٨٠ ه) تاریخنده (درپی) قونتلغنده واقع (وتون) شهرینه و (لیون) و (غرینوبل) شهرلرینه سیاحت و هر برنده سوء انظار عامه+یی قزاندیغی جهتله ینه پارسه رجعت ایلدیسه ده هركس كندوسندن فوق الغایه متنفر بولندیغنه بناءً پارسده دخی راحت و حضور كورە+میوب نهایت بر طاقم اوهامه و بالآخره شدتلی بر سودا علتنه دوچار اولدیغی حالده (١٧٧٨ م و ١١٩٢ ه) تاریخنده بغتةً انفاس حیاتنی بتوردی. غایت مغرور خودبین و عدیم الامتزاج ایدی. تألیفاتی پك چوق ایسه ده اکثریسی فساد آمیز شیلردن عبارتدر. پارسده ساكن اولدیغی سوقاق نامنه اوله+رق ژان ژاق روسو تسمیه ایدلمشدر. و مسقط رأسی اولان جنوه+ده كذلك نامنه بر هیكل ركز اولنمشدر. مساوات و سربستی افكارینی ابتدا
آوروپالیلرك ذهننه القا ایدن بودركه اشبو القاآتندن بعد زمان نیجه نیجه اختلالات ظهوره كلدی