لغات تاریخیه و جغرافیه

Lugat-ı Tarihiyye ve Coğrafiyye

روزكار

Rüzgâr

روزكار — هوانك تسخن و انبساطندن حاصل هوا طالغه+لرندن عبارتدر هر بر جسم برودتله منقبض و حرارتله منبسط اولدیغی كبی هوا دخی شعاعات شمسیه+نك تأثیریله یاخود ارضك حرارتیله منبسط اولدیغندن كرۀ نسیمك براز یری بو صورتله تسخن ایتدكده ایصنمش اولان هوا طبقاتی منبسط اوله+رق اولدن مستوعب اولدیغی مكاندن زیاده مكان استیعاب ایتمك استیوب جوارنده بولنان صغوق هوایی دیكر محله دفع و هوا طبقاتنی تحریك و تمویج ایتمكله روزكار حاصل اولور. موسم صیفده كونشك طلوعی اثناسنده حس اولنان خفیف روزكار ایله مدار جدی و مدار سرطان اره+لرنده شرقدن غربه طوغری هبوب ایدن ریاح دائمه بو صورتله حصوله كلور و هوا موسم صیفده سیجاق و فصل شتاده صوغوق اولدیغندن اكثریا شدتلو روزكارلر قیش كونلرنده هبوب ایدر یعنی برودت مناسبتیله قیش كونی كرۀ نسیم زیاده+جه منقبض بولنه+رق تسخن ایتدكده فوق الغایه شدتله منبسط اولوب شدتلی روزكارلر حصوله كتورر. بوندن بشقه سببلری دخی واردر