لغات تاریخیه و جغرافیه

Lugat-ı Tarihiyye ve Coğrafiyye

دیمستوقلی

دیمستوقلی — اسكی اتنه+لولرك مشهور قوماندانلرندندر. بو آدمك هرنقدر نسلی مجهول ایسه ده جنرال ملتیادینك عجملرله ایتدیكی (ماراثون) محاربه+سنده كوریلان ثبات وغیرتیله شجاعتی معلوم اولدیغندن عجملرک (٥١١٤ خ) تاریخنده یعنی میلادك درت یوز سكسان سنه مقدمنده ایتدكلری هجومده كنج اولدیغی حالده قوماندان تعیین اولنمش ایدی. مومی الیه محاربه+نك ظهورندن اول بویله بر بیوك هجوم اوله+جغنی اكلایوب احتیاطاً برچوق سفینه+لر اعمال و لزومی قدر مهمات حربیه تدارك و استحصال ایلمش و اره+دن چوق کچمكسزین شاه (سرخس) برقاچ یوز بیك عسكرایله بتون یونانستانی بعدالاستیلا اتنه+یه یاقلاشدقده مومی الیه اتنه اهالیسنی كاملا سفینه+لره بیندیروب دكزه آچدقدن صكره زیر قومانداسنده اولان سفائن حربیه ایله مشهور (سالامین) محاربۀ بحریه+سنی قزانه+رق عجملری رجعته مجبور ایتمشدر. مؤخراً دخی قومشولری اولان اسپارتلولره قارشو اتنه+نك اطرافنه بر جسیم سور چكدیروب (پیره+یه) فوق الغایه تقویت ویردیسه ده اسپارتلولر بو تداركاتك كندو علیهلرنده اولدیغنی اكلادقلرینه بناء اعمال دسایسه ابتدار و دیمستوقلی+یی محو و ازاله یولنده ممكن مرتبه صرف ماحصل اقتدار ایله نهایت یولنی بولوب بش سنه ایچون طرد و تبعیده موفق اولدیلر بونك اوزرینه مومی الیه اولوقت عجم شاهی بولنان (اردشیر) نزدینه التجا ایدوب اوراده معزز اوتورمقده ایكن اوچ سنه صكره (اردشیر) آتنه+یه تكرار سفر آچه+جغنی و بو سفرده كندوسنی قوماندان تعیین ایدە+جكنی افاده ایلدی دیموستوقلی اوچ سنه+دن برو كوردیكی التفاته مقابل مشارالیهك بو امرینی حسن تلقی+یه هر نقدر بورجلی ایسه ده بشقه بر ملت ایچون كندو ملتنه قلیج اورمغی دخی حمیت و محبت وطنیه+سنه صیغدیره+مدی بنابرین هر ایكی طرفه یعنی نه نان و نعمتنی ییدیكی عجملره بر اهانت و نه ده اغورنده جانسپارانه خدمت ایلدیكی حالده بالآخره كندوسنی وطنندن مطروداً چیقاران ملتی علیهنده بر سوء حركت وقوعنه بادی اولمامق اوزره اردشیردن برای ملاحظه مساعده استحصالیله او كیجه كندو كندوسنی دارالعدمه ایصال ایلمشدر. (ایشته عالمده ابقای نیك نام بویله اولور).