لغات تاریخیه و جغرافیه

Lugat-ı Tarihiyye ve Coğrafiyye

دیكیلی طاش

Dikilitaş

دیكیلی طاش — متقدمینك اوزری یازولی اولمق اوزره براقمش اولدقلری دیكیلی طاشلر قرق عدد تخمین اولنیور بونلرك یدیسی مصرده اون ایكیسی روماده ایكیسی ایتالیاده ایكیسی استانبولده ایكیسی فرانسه+ده بشی انكلتره+ده حالا قأیماً موجود اولوب قصوراونی مفقوددر. درسعادتده یازیلی و یازیسز برقاچ محلده واردر. بونلردن عورت پازارنده اولان دیكیلی طاش بر طرفه میل ایله ابنای سبیلی قورقویه دوشوردیكندن (١٧١١ م و ١١٢٣ ه) تاریخنده هدم اولنوب یالكز كرسیسی ابقا ایدلمشدر. سراجخانه جوارنده (قزطاشی) نامیله شهرت بولان دیكیلی طاش حقنده تاریخلر برشی یازمیور ایسه ده روما ایمپراطورلرندن برینك قزی یاخود زوجه+سنك مزاری اولمق كركدر بونك اوزرنده بولنان قرمزی صماقیدن مصنوع صندوقه دها یقین وقته قدر طورویور ایدی. سلطان احمد میداننده+كی اورمه دیكیلی طاش (٩٦٠ م و ٣٤٩ ه) تاریخنده ایمپراطور طقوزنجی (قسطنطین) امریله انشا اولنمشدر. سلطان احمد میدانده اولان بورمه+لی عمود ایچون (دلفی) وینه محل مزبورده اولان دیكر یكپارە دیكیلی طاش ایچون (هیروغلیف) و چنبرلی طاش ایچون (چنرلی) كلمه+لرینه نظر بیوریله . طوپ قپو سرای همایونی داخلنده بولنان دیكیلی طاش روما ایمپراطوری ایكنجی (قلاودیوس) اراده+سیله (٢٥٨ م) سنه+سنده ركز ایدلدی مشار الیه بونی (غوت) طائفۀ وحشیه+سنه علامت غالبیتی اولمق اوزره ركز ایتدیرمش و اوزرینه لاتین لسانیله (فورتونه ره دوچی اوپ دیویكتوس غوتوس) عباره+سنی یازدیرمش ایدی.