دیقران — ارماستانده بو نامده پك چوق ذوات اجرای حكومت ایتدی. برنجی دیقران (٥٠٢٩ خ) تاریخنده یعنی میلادك بشیوز التمش بش سنه مقدمنده تخته جلوس و بش سنه صكره ماد پادشاهی كیكاووسه اعلان حرب ایتدی و كیكااوسك نبیرە+سی مشهور (كیخسرو) دخی دیقران ایله بیرلشوب كیكااوسك اردوسنی پریشان و كندوسنی اخذ و اعدام ایتدیلر. بر روایتده دیاریكرك موسسی بودر.
ایكنجی دیقران (٥٤٧٦ خ) تاریخنده یعنی میلادك یوز اون سكز سنه مقدمنده پارت قرالی و قرنداشی مهرداد طرفندن ارمنستان تختنه اجلاس اولندی بو ذات مدت ادارە+سی اولان یكرمی اوچ سنه ظرفنده پونت و قپادوقیا و پتینیا و مسی ممالكنی حرباً تحت اطاعته آلوب و سلوسیدلره قارشو مهرداد ایله اتفاق و محاربه ایدوب ارمنستان اهالیسنی زراعته تشویق و موافق عقل و حكمت بر طاقم قوانین وضع و آثار تاریخیه+نك جمعنه همت ایلدیکی حالده عاقبت كندو رؤسای عسكریه+سندن برینك یدیله قتل اولندی.
اوچنجی دیقران دیقران ثانینك اوغلی و خلفیدر بو دخی مدت سلطنتی اولان اوتوزبش سنه ظرفنده شهنشاه عنواننی و پونت قرالنك قزینی آلوب قرال مرقوم ایله متفقاً رومالولره اعلان حرب ایتدی و اناطولیده متصرف اولدیغی ممالكنك همان نصفنی و روم ایلنده تراس و ماكیدونیا و آتنه ولایتلرینی
آلوب یوزبیك روما عسكرینی بر كونده اخذ و اعدام ایلدیسه ده صوكنی كتورە+مدی یعنی میلادك التمش یدی سنه مقدمنده روم جنرالی پومبه+یه فنا حالده مغلوب اوله+رق التی بیك قنطار (تخمیناً اوتوز ایكی ملیون فرانق) كموش تضمیناتك اعطاسنه و آلدیغی یرلرك ردندن بشقه ارمنستان صغرا ممالكنك تركنه مجبور اولدی. بونك ایكنجی اوغلی و خلفی دخی دیقران نامیله یاد اولنور ایدی.